Папа Францішак: У Аргенціну я не вярнуся, памру ў Рыме
Папа Рымскі Францішак прыняў на аўдыенцыі Нэльсана Кастра, журналіста і доктара з Аргенціны. У інтэрв’ю свайму суайчынніку Папа адзначыў, што на радзіму больш не вернецца, паведамляе catholic.by.
Vatican News
«Я памру тут, у Рыме, не вярнуся ўжо ў Аргенціну», — падзяліўся пантыфік, а таксама адзначыў, што падобна свайму папярэдніку не выключае свайго сыходу на пенсію. Перспектыва смерці, як дадаў Папа, не выклікае ў яго страху.
Разам з тым кіраўнік Каталіцкага касцёла сказаў, што адчувае сябе добра і поўны энергіі.
Журналіст пацікавіўся, ці праходзіў Папа калі-небудзь псіхааналіз.
«Ніколі, — адказаў Пантыфік, але прызнаўся, што ў часы служэння правінцыялам іезуітаў, калі ў Аргенціне панавала дыктатура, ён кансультаваўся з псіхатэрапеўтам.
— Яна дапамагла мне перамагчы ў той час страх. Часам я хаваў некаторых людзей і дапамагаў ім выехаць з краіны.
Уявіце сабе, як я баяўся, калі вёз кагосьці ў машыне, накрытага толькі пледам, і так праязджаў праз тры пункты вайсковага кантролю. Гэта выклікала ўва мне велізарнае напружанне».
