Пашынян выйшаў да сваіх прыхільнікаў у цэнтры Ерэвана
Прэм'ер-міністр Арменіі Нікол Пашынян выйшаў да сваіх прыхільнікаў на Плошчу Рэспублікі ў цэнтры Ерэвана пасля таго, як заявіў пра спробу арміі зладзіць вайсковы пераварот.
Падчас выступу Пашынян назваў сітуацыю ў краіне кіраванай і заклікаў усіх дамовіцца, каб пазбегнуць сутыкненняў. Пры гэтым заклік ваенных да роспуску ўрада ён палічыў эмацыйнай рэакцыяй, піша lenta.ru.
«У Арменіі — атмасфера братэрства, але гэта не азначае, што палітычнага дыялогу і абмеркаванняў не будзе. У Арменіі ў нас няма ворагаў. Заклікаю да спакою. Вядома, абстаноўка напружаная, але нам патрэбная размова, а не канфрантацыя».
Раней 25 лютага ўзброеныя сілы Арменіі запатрабавалі адстаўкі Пашыняна і ўрада краіны. Спецыяльную заяву генеральнага штаба падпісала ўсё кіраўніцтва, а таксама камандзіры буйных воінскіх злучэнняў і кіраўнікі ўсіх упраўленняў. Сам Пашынян ахарактарызаваў сітуацыю як спробу ваеннага перавароту.