«Здзейсніў не менш за тры кідкі»: былому ратавальніку Рыгору Давыдаву далі чатыры гады калоніі ўзмоцненага рэжыму
Суд Фрунзенскага раёна асудзіў 26-гадовага Рыгора Давыдава — былога супрацоўніка МНС — на чатыры з паловай гады калоніі ўзмоцненага рэжыму. Яго прызналі вінаватым паводле ч. 2 арт. 293 КК, паведамляе spring96.org.
Суддзя — Юлія Блізнюк. Дзяржаўнае абвінавачанне — Аліна Касьянчык.
У чым прызналі вінаватым?
Згодна з фармуліроўкай абвінавачання, ён нібыта здзейсніў не менш за тры кідкі нявызначанымі прадметамі ў бок праезнай часткі і спецыяльнага транспарта 10 жніўня недалёк ад ГЦ «Рыга». Яго прызналі вінаватым ва ўдзеле ў пагроме, а ўзброены супраціў супрацоўнікам міліцыі, які першапачаткова прысутнічаў у абвінавачанні, выключылі з яго.
Падчас першага пасяджэння былі прагледжаныя відэаматэрыялы справы. На іх асоба, якую немагчыма вызначыць, здзяйсняе, са слоў дзяржабвінаваўцы, «замахванні нявызначаным прадметам». Напрамак і супрацоўнікі, у бок якіх ажыццяўляліся замахванні, таксама не выяўленыя: у справе няма пацярпелых.
На судзе Рыгор віну не прызнаў і адмовіўся ад сведчанняў.
Падчас апошняга слова ён папрасіў прабачэння ў бацькоў, што за чатыры месяцы ім давялося перажываць за яго, а таксама падзякаваў усім за падтрымку. Ён сказаў, што шмат гадоў аддаў на абарону жыццяў людзей, нават рызыкуючы сваім жыццём. Звярнуў увагу, што ён даў прысягу і ведае, што такое выконваць закон, таму не парушаў яго і не здзяйсняў таго, у чым яго абвінавачваюць.
Суддзя Юлія Блізнюк асудзіла хлопца на чатыры з паловай гады калоніі ўзмоцненага рэжыму.
Спагнанне пазова Мінсктранса ў 21 тысячу 831,69 рубля і дзяржпошліна памерам 1158 рублёў вылучаныя ў асобную грамадзянскую вытворчасць.
