Хатняя і рэальная хімія. У Брэсце вынеслі прысуд першай дзясятцы абвінавачаных па справе аб «пратэсным карагодзе»
25 лютага ў Брэсце абвясцілі прысуд першым дзесяці абвінавачаным паводле крымінальнай справы аб пратэсным карагодзе на скрыжаванні праспекта Машэрава і бульвара Касманаўтаў 13 верасня мінулага года, піша Tut.by.
Суд прызнаў усіх дзесяцёх вінаватымі ў актыўным удзеле ў групавых дзеяннях, якія груба парушаюць грамадскі парадак, што пацягнула парушэнне працы транспарту, прадпрыемстваў і арганізацый.
Тром абвінавачаным прызначылі хатнюю хімію: па паўтара гады для 25-гадовай настаўніцы замежных моў Марыны Глазавай і Яраслава Ярашука, 20-гадовая студэнтка трэцяга курса філфака БДУ Марына Сірэцан атрымала год.
Федарэнка, Каўпачыка, Якубука, Дзенісенку, Літвіна суд адправіў на звычайную хімію (у выпраўленчую ўстанову адкрытага тыпу) на паўтара гады, Максіма Жарава і Вадзіма Варановіча — на два гады.
Падчас абвяшчэння прысуду камусьці са сваякоў абвінавачаных стала дрэнна — жанчыне выклікалі хуткую.
Пасля абвяшчэння хтосьці ў зале крыкнуў: «Жыве Беларусь!»