Мукавозчык пад патранажам Мінінфарма выдае «сацыяльна значную» кнігу «Рэвалюцыя мокрых штаноў»
Міністэрства інфармацыі зацвердзіла план выпуску «сацыяльна значных выданняў у 2021 годзе». Сярод кніжак пра жывапіс, гінекалогію і патаемнае жыццё жывёлаў Белавежскай пушчы выдавецтва «Беларусь» плануе надрукаваць 1500 асобнікаў зборніка Андрэя Мукавозчыка пад назвай «Рэвалюцыя мокрых штаноў». Туды ўвойдуць яго калонкі, якія былі надрукаваныя ў «СБ. Беларусь сёння».
Андрэй Мукавозчык, калумніст «СБ». У сваіх артыкулах жорстка і нават брудна праходзіцца па незалежных СМІ, мірных пратэстоўцах і апазіцыйных палітыках
У каментары «НН» дырэктар выдавецтва «Беларусь» Сяргей Пешын патлумачыў, што такі вялікі тыраж аргументаваны папярэднім попытам:
«Ëсць пэўныя замоўцы, якія выкупаюць гэты тыраж — і кнігарні, і не толькі. Не магу назваць рэквізіты пакупнікоў, бо гэта камерцыйная таямніца. Калі б не было попыту, мы б такі тыраж, зразумела, не рабілі».
Плануемы кошт выдання — каля 15 рублёў.
Ëсць шанец, што патрымаць яго ў руках ужо можна будзе на міжнароднай кніжнай выставе-кірмашы, што пройдзе ў Мінску 18-21 лютага.
«Можа, і будзе прэзентацыя [кнігі Мукавозчыка] на кніжнай выставе. Ëсць яшчэ працэс друку, калі ён скончыцца па часе, цяжка сказаць», — распавёў Сяргей Пешын.
Сам аўтар «Рэвалюцыі мокрых штаноў» таксама пацвердзіў «НН», што плануе быць на кніжнай выставе з прэзентацыяй сваёй кнігі.
«Раскладу ў мяне няма, удакладняйце ў Міністэрстве інфармацыі. Я кніжку саму па сабе ў яе фізічным выглядзе пакуль не трымаў у руках», — сказаў Андрэй Мукавозчык.
У Мінінфарме паведамляюць, што поўны расклад праграмы будзе гатовы толькі праз пару дзён.
