Кіроўца, які сігналіў 11 лютага на праспекце Незалежнасці, атрымаў 15 сутак
За аўтамабільны сігнал 11 лютага на праспекце Незалежнасці мужчыну арыштавалі на 15 сутак, паведамляюць праваабаронцы.
Суд Цэнтральнага раёна арыштаваў сёння на 15 сутак аўтамабіліста Паўла Падаляку, які ўчора сігналіў на праспекце Незалежнасці. Каля 9-й раніцы яго спыніў рэгуліроўшчык каля цырка і сказаў, што яму перадалі па рацыі, што ён «падаў гукавы сігнал». З супрацоўнікам ДАІ Павел на сваёй машыне праехаў у Цэнтральнае РУУС. І там ва ўнутраным дворыку за закрытай брамай ён нібыта адмовіўся прайсці ў РУУС, пачаў упірацца нагамі і хапацца за форменнае абмундзіраванне супрацоўніка. На яго склалі пратакол па арт. 23.4 КаАП за непадпарадкаванне. Але ў РУУС яму прапаноўвалі падпісаць пратакол, што ён стаяў на Незалежнасці і выкрыкваў лозунгі.
У судзе дапыталі сведку-супрацоўніка, на што Павел Падаляка сказаў: «Дзе ў чалавека сумленне? Усё, што кажа сведка, глупства, а дурных пытанняў у мяне няма».
Суддзя Дзмітрый Карсюк прызнаў Паўла вінаватым па арт. 23.4 КаАП і арыштаваў яго на 15 сутак.