Знайсці
12.02.2021 / 15:55РусŁacБел

«Застрэлься, с***». Клецкую пенсіянерку будуць судзіць за абразу амапаўца ў сацсетках

65-гадовую Святлану Панамарову з Клецка чакае суд. Жанчыне пагражае да 3 гадоў хіміі за каментар у фэйсбуку.

Панамарова — былая адвакатка, цяпер на пенсіі. 

«Гэта было 26 кастрычніка. У фэйсбуку быў нейкі пост са здымкам маладога хлопца ў шортах, было напісана, што гэта нібыта амапавец і была яго характарыстыка. 

Пад допісам 112 каментароў, адзін з іх — мой. Я напісала: «Застрэлься, с***», — расказвае Святлана «Нашай Ніве». — А 12 лістапада да мяне прыйшлі. Я жыву адна і раптам бачу, як 6 мужыкоў заходзяць у двор. Падумала спачатку, што, можа, сацыяльныя службы правяраюць адзінокіх.

А я якраз коцікаў карміла, рубіла ім курыныя галовы. Ну і выйшла з сякеркай з дома неяк аўтаматычна. Тыя мужыкі ўцяклі за вароты адразу, кажуць: трэба пагаварыць, але схавайце сякеру. Я кажу: ой, вас шасцёра маладых, а вы баіцеся старую бабу з сякерай!»

Але пусціла іх у хату. Зайшлі, давай мне пасведчаннямі ў нос тыкаць».

Па словах Святланы, да яе прыехалі двое супрацоўнікаў аддзела ўласнай бяспекі МУС.

«Двое з Мінска з УУБ, двое нейкіх мясцовых міліцыянтаў і дваіх з мясцовай вучэльні яны ўзялі панятымі.

Паказалі санкцыю пракурора вобласці: агледзець памяшканне і забраць прыладу, з якой я напісала той каментар. Аддала ім тэлефон, а яны кажуць: будзем праводзіць ператрус. Я кажу: хлопцы, тут жа напісана «агляд памяшкання». Я юрыст і працавала адвакатам, ператрус ад агляду магу адрозніць».

«Госці» правялі агляд. 

«Адзін з гэтых мінскіх быў адэкватны, а другі мне кажа: вы польскі шпіён!

Я адказваю: Ды вы што? І грошы атрымліваю? — пасміхаецца Святлана. — Пасля яны адпусцілі нашых клецкіх міліцыянтаў, адпусцілі і панятых. І кажуць мне: скажыце, што вы раскайваецеся ў тым, што абразілі і просіце прабачэння. Я кажу: не, бо я яго не зневажала. І якая там можа быць абраза пры выкананні службовых абавязкаў, калі на фота, пад якім каментар, чалавек стаіць у шортах каля рэчкі?»

У выніку Панамарова прызнала, што напісала камент, але адзначыла, што намеру кагосьці абразіць у яе не было. А 29 снежня ёй пазванілі з клецкага СК і паведамілі: заведзеная крымінальная справа. Пацярпелым прызналі таго амапаўца з фота.

Раніцай 31 снежня Панамарова была на допыце ў СК. 

«У заключэнні эксперта напісана, што мае словы — гэта «негатыўная адзнака асобы» таго амапаўца», — кажа Святлана. 

Цяпер справа ў пракурора. Панамарова напісала хадайніцтва аб спыненні крымінальнай справы. Ёй адмовілі.

Жанчыну чакае суд. Пакараць за абразу могуць штрафам, арыштам, грамадскімі працамі ці абмежаваннем волі — хіміяй.

«Я пенсіянер, мне даць грамадскія працы нельга. Могуць даць арышт, штраф ці абмежаванне волі па месцы жыхарства. Гляджу, што па такіх справах даюць абмежаванне волі ў асноўным. Ну буду скардзіцца, а што рабіць?» — кажа Святлана Панамарова. 

NN.by

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера