У Паўночнай Карэі не знайшлі ідэй па выратаванні эканомікі
Лідар КНДР Кім Чэн Ын раскрытыкаваў працу ўрада і звольніў галоўнага эканаміста краіны, прызначанага месяц таму, з-за таго, што той не знайшоў ідэй па выратаванні эканомікі ад цяперашняга крызісу.
Wikimedia Commons
Пра гэта са спасылкай на рэпартаж паўночнакарэйскага тэлебачання паведамляе Associated Press.
Адначасова кіраўнік дзяржавы прызнаў, што прынятыя раней нацыянальныя планы па развіцці эканомікі не спрацавалі.
Чарговы праект быў абнародаваны ў студзені, але Кім Чэн Ын у чацвер, 11 лютага, абвінаваціў міністраў у нерэальна высокіх мэтах па вытворчасці сельскагаспадарчай прадукцыі і заніжаных мэтах па вытворчасці электраэнергіі.
Ён cказаў, што ўрад праваліў распрацоўку плана ў ключавых эканамічных абласцях і звёў разам разрозненыя паказчыкі абы-як. Па словах лідара краіны, міністры не здольныя выпрацаваць інавацыйны пункт гледжання.
