Мэр Мінска ацаніў шкоду ад пратэстаў: 1,25 мільёна рублёў
Пра гэта журналістам паведаміў старшыня Мінгарвыканкама Уладзімір Кухараў. Па яго словах, сёння спагнана з грамадзян, ужо 980 тысяч рублёў, піша «Звязда».
«Тыя людзі, што нанеслі шкоду камунікацыям, дваравым тэрыторыям, выяўлены, прыцягваюцца да адказнасці і з іх спаганяюцца сумы, якія выстаўлены з боку камунальных службаў горада Мінска», — расказаў старшыня Мінгарвыканкама.
На яго думку, выкарыстанне адміністрацыйных, крымінальных пакаранняў растлумачыць людзям неправамернасць іх паводзінаў.
«Тое, што зроблена ў Мінску, — праца мільёнаў людзей, што пражываюць тут, клапоцяцца, любяць свой горад, робяць шмат, каб ён заўсёды быў прыгожы, утульны, камфортны для пражывання і гасцей сталіцы. Сёння людзі, якія сваімі дэструктыўнымі дзеяннямі разбураюць зробленае, — у першую чаргу, гэта іх характарызуе як безадказных людзей, якія да горада і яго жыццядзейнасці адносяцца адмоўна. Таму мы прымем самыя сур'ёзныя меры, каб далей у нас такіх выпадкаў болей не было», — пераканы ён.
