Брытанскі навуковец уцёк з іранскай турмы
Брытанскі вучоны іранскага паходжання Каміл Ахмадзі, якому пагражае 9 гадоў турмы ў Іране, уцёк, калі яго выпусцілі пад заклад, і самастойна цераз горы перайшоў мяжу.
Фота Depositphotos.com
Каміла Ахмадзі асудзілі ў Іране 2 месяцы таму за «супрацоўніцтва з варожым урадам». Навукоўца абвінавацілі ў супрацы з арганізацыяй, якая атрымлівала фінансаванне ад ЗША. Вучоны адмаўляе сваю віну. Ён збег з-пад хатняга арышту — яму ўдалося шчасліва перайсці мяжу ў гарах і дабрацца да Вялікабрытаніі, піша BBC.
Даследаванні Каміла Ахмадзі былі прысвечаныя дзіцячым шлюбам у Іране. Гэта прыцягнула ўвагу іранскай улады, бо акадэмік заклікаў павысіць узрост, з якога дзяўчаты могуць уступаць у шлюб (цяпер у Іране дзяўчат могуць аддаваць замуж з 13 гадоў).
Каміл Ахмадзі перакананы, што яго арышт у 2019 годзе тлумачыцца яшчэ і двайным грамадзянствам. Такім чынам урад Ірана хацеў адпомсціць Вялікабрытаніі за арышт іранскага нафтавага танкера каля Гібралтара.
Невядома, як на гэта адрэагуе Тэгеран і як гэта паўплывае на іншых жыхароў з двайным грамадзянствам.
