Пенсіянерак са сталічнай Малінаўкі пакаралі працяглымі «суткамі»
Суд Маскоўскага раёна Мінска разгледзеў сёння справы пенсіянерак, якіх затрымалі яшчэ 29 студзеня на вуліцы Рафіева, паведамляюць праваабаронцы.
Усяго было затрымана 7 жанчын, але ноччу 68-гадовую Ніну Кавалгіну ўсё ж адпусцілі. Са слоў яе сына, пенсіянеркі сустрэліся, каб сабраць грошы для хворага дзіцяці.
61-гадовую Ірэну Курацкую суддзя Маскоўскага раёна Пірожнікава адправіла на 15 сутак арышту. Жанчына перамагла рак, цяпер у яе рэмісія.
Таццяна Ледак па рашэнні суддзі Лідзіі Целіцы правядзе 15 сутак на Акрэсціна. На судзе жанчына патлумачыла, што яна з астатнімі пенсіянеркамі збіралі грошы на лячэнне дзіцяці. Яшчэ ў іх былі плакаты ў падтрымку Ігара Лосіка. 62-гадовая Таццяна паведаміла, што дома яе чакае хворая 85-гадовая маці.
62-гадовая Ларыса Свірыдовіч вызвалена са штрафам у 50 базавых па рашэнні суддзі Святланы Бандарэнка.
56-гадовай Таццяне Сянькевіч суддзя Сяргей Кацэр таксама прысудзіў па арт. 23.34 КаАП 15-суткавы арышт.
Гэты ж суддзя таксама адправіў на 15 сутак і Святлану Жмаеву 1960 года нараджэння. Пенсіянерка сказала, што накіроўвалася ў сад па ўнука, але ўбачыла жанчын, падышла да іх, каб паглядзець на плакаты. У гэты час іх усіх і затрымалі.
Суддзя Малашанка пакарала 15-суткавым арыштам 65-гадовую Таццяну Дамброўскую.
У выніку, суд Маскоўскага раёна Мінска асудзіў пенсіянерак агулам на 75 сутак і 50 базавых (1450 рублёў).
