«Алкаголем не пахне наогул»: апублікавана расследаванне па факце смерці Рамана Бандарэнкі. У тым ліку білінг Наталлі Эйсмант
Ініцыятыва BYPOL апублікавала расследаванне па факце смерці Рамана Бандарэнкі. Што ў ім новага і важнага? Называюцца прозвішчы канкрэтных сілавікоў, якія знаходзіліся ў той вечар на плошчы Пераменаў. Таксама публікуецца выпіска з іх білінгаў, а таксама білінг Дзмітрыя Баскава, Наталлі Эйсмант і Ганны Эйсмант. З дакументаў вынікае, што ўсе яны таксама былі на плошчы Пераменаў.
BYPOL апісвае стан Рамана пры паступленні ў аддзяленне міліцыі: ён ужо быў у цяжкім стане, не мог размаўляць. З Цэнтральнага РУУСа пазванілі ў хуткую дапамогу ў 23:04 12 лістапада. Дзяжурны паведаміў медыкам пра моцна п'янага чалавека — такую інфармацыю ён атрымаў ад амапаўцаў, якія прынеслі Рамана Бандарэнку.
Але ўжо ў наступным званку міліцыянер удакладняе, што паху алкаголю няма зусім.
Медыкі забралі Бандарэнку ў крытычным стане і не маглі рабіць паўнавартасную аперацыю, бо ён бы яе не перанёс.
З апублікаваных матэрыялаў вынікае, што прычынай смерці Рамана Бандарэнкі стала «траўматычнае субдуральнае кровазліццё».