Доктар Мікіта Салавей, які даў публічны адказ Качанавай, больш не галоўны інфекцыяніст Мінска
Доктар Мікіта Салавей больш не галоўны пазаштатны інфекцыяніст камітэта аховы здароўя Мінгарвыканкама. На гэтай пасадзе ён быў з снежня 2016 года. Салавей застаецца дацэнтам кафедры інфекцыйных хвароб БДМУ.
Фота Вольгі Шукайла
Пра тое, што Мікіта Салавей больш не займае пасаду галоўнага пазаштатнага інфекцыяніста Мінска, піша Tut.by.
— Гэта праўда. З сённяшняга дня галоўны пазаштатны інфекцыяніст камітэта па ахове здароўя Мінгарвыканкама Святаслаў Алегавіч Вельгін, — адказаў Мікіта Уладзіміравіч.
Святаслаў Вельгін — намеснік галоўнага доктара па медыцынскай частцы гарадской клінічнай інфекцыйнай бальніцы Мінска.
Мікіта Салавей — адзін з самых вядомых беларускіх інфекцыяністаў, ён не адзін раз праводзіў анлайн-стрым з нагоды прафілактыкі каранавіруснай інфекцыі, вакцынацыі і плыні захворвання. У лістападзе 2020 года Мікіта Салавей стаў членам Каардынацыйнай рады.