У Расіі пратэст вырваўся ў рэгіёны — галоўнае за 23 студзеня
Нешматлікіх людзей з плакатамі ў Екацярынбургу адразу затрымлівалі. Фота «Новай газеты»
— Ніколі раней пратэсты ў рэгіёнах не былі такімі масавымі, як 23 студзеня. У Ніжнім на вуліцу выйшлі 10 тысяч чалавек, у Екацярынбургу, Уладзівастоку, Іркуцку і яшчэ сотні абласных гарадоў — дзе тысячы, дзе сотні.
— Паліцыя затрымлівала людзей за сам факт выхаду на вуліцы. Колькасць затрыманых перавысіла 3000 чалавек.
— Пратэсты былі мірнымі.
— Штабы Навальнага заклікаюць да выхаду на вуліцы і ў наступныя выходныя.
— У многіх гарадах людзі прыходзілі ў тым ліку з беларускімі сцягамі, нібы пераймаючы эстафету. У Піцеры народ па-беларуску скандаваў «Далучайся!».
— Колькасць пратэстоўцаў у правінцыі азначае, што інфармацыя пра карупцыю, распаўсюджаная Навальным, выцекла за межы сталіцы. Апазіцыя ў Расіі выйшла за межы Масквы і Піцера, улады зрабілі стаўку на падаўленне.
— Людзі выйшлі без лозунгаў і амаль без сцягоў — такі кантраст з нацыянальна афарбаваным пратэстам у Беларусі. Але і паказчык таго, наколькі задушаная грамадзянская супольнасць у царстве Пуціна.
— Калі бачыш 5-тысячны марш у Екацярынбургу пры 28-градусным марозе, дзе людзі вымушаны ісці моўчкі, каб не застудзіць горла, разумееш, што Пуцін не зможа гэта ігнараваць. Імаверна, улады Расіі будуць вымушаныя больш траціць на сацыяльныя патрэбы і павышаць заробкі. Не выключана, што ў найбліжэйшыя гады Расія будзе больш занятая сваімі ўнутранымі праблемамі, чым яна была ў 2010-х.
