Светлагорскім рыбакам давялося ратавацца на дрэве ад зграі ваўкоў
19 студзеня двое жыхароў Светлагорска, Аляксандр і Віталь, адправіліся на рыбалку. Месца выбралі ціхае, далей ад людзей — Белагорскае старарэчча ў заказніку «Выдрыца». Расставілі жарліцы і сталі назіраць за рыбай, піша выданне «Ранак».
Бліжэй да поўдня рыбакі заўважылі непадалёк ваўка.
— Неўзабаве з'явіліся яшчэ тры драпежнікі, — успамінае Аляксандр. — Зграя прайшла ўбаку і знікла ў хмызняку. Праз паўгадзіны ваўкі вярнуліся, але цяпер іх было шэсць. Адлегласць да іх была не больш за 100 метраў. Адзін воўк накіраваўся да нас, астатнія сталі разыходзіцца па баках.
Нервы ў мужчын не вытрымалі. Аляксандр, які ў гэты час размаўляў па тэлефоне з жонкай, папрасіў яе звязацца з МНС. Пасля гэтага сябры пабеглі на бераг і залезлі на дрэвы, а ваўкі схаваліся ў хмызняку на процілеглым беразе старарэчча.
Інфармацыя ад аператыўнага дзяжурнага РАНС паступіла дырэктару Светлагорскага БТПР Віктару Лапею. Па яго распараджэнні да месца здарэння выехалі тры паляўнічыя. Калі яны прыбылі ў заказнік, Аляксандр і Віталь паказалі ім кірунак, куды сышлі драпежнікі.
Леснікі абследавалі тэрыторыю і прайшлі па слядах ваўкоў. Зграя пайшла ў бок Жлобінскага раёна, пераследаваць яе не было магчымасці.
— У ваўкоў цяпер гон, яны збіраюцца ў зграі, — кажа дырэктар Светлагорскага РГА БТПР Віктар Лапей. — Пры сустрэчы з драпежнікамі ні ў якім разе нельга паказваць свой страх, мітусіцца, уцякаць. Наадварот, трэба праявіць агрэсіўнасць. Стаць у поўны рост, махаць рукамі ці палкай, крычаць. Дзікія жывёлы генетычна баяцца людзей і першымі не нападаюць.
