Генпракуратура ініцыюе абвяшчэнне Паўла Латушкі ў міжнародны вышук
Генеральная пракуратура ініцыюе міжнародны вышук Паўла Латушкі. Адпаведны пакет дакументаў ведамства накіравала ў Інтэрпол, паведамляе прэс-служба Генпракуратуры.
Фота Надзеі Бужан
У ведамстве растлумачылі, што ў дачыненні да Паўла Латушкі ў рамках крымінальнай справы з санкцыі пракурора абраная мера стрымання ў выглядзе заключэння пад варту.
Яму інкрымінавана здзяйсненне злачынстваў, прадугледжаных ч. 1 арт. 357 (Змова або іншыя дзеянні, здзейсненыя з мэтай захопу ці ўтрымання дзяржаўнай улады неканстытуцыйным шляхам), ч. 1 арт. 361−1, ч. 3 арт. 361 (Публічныя заклікі да захопу дзяржаўнай улады з выкарыстаннем сродкаў масавай інфармацыі або Інтэрнэт) Крымінальнага кодэкса Рэспублікі Беларусь.
Генеральная пракуратура накіравала ў Нацыянальнае Цэнтральнае бюро Інтэрпола ў Беларусі пакет дакументаў, неабходных для абвяшчэння ў міжнародны вышук Паўла Латушкі.
Экс-міністр культуры і былы кіраўнік Купалаўскага тэатра пакінуў Беларусь у канцы жніўня.
