Уладзіміру Няпомняшчых з Гомеля выстаўлена яшчэ адно абвінавачванне — абраза службовай асобы
У дадатак да першага абвінавачання — «пагроза гвалту» ў дачыненні да пракурора, пенсіянера абвінавацілі і ў абразе гэтай службовай асобы.
68-гадоваму пенсіянеру МУС, актывісту АГП Уладзіміру Няпомняшчых з Гомеля выставілі яшчэ адно абвінавачанне, піша «Радыё Свабода».
У дадатак да першага абвінавачання — «пагроза гвалту» ў дачыненні да пракурора, пенсіянера абвінавацілі і ў абразе гэтай службовай асобы.
Цяпер Уладзімір Няпомняшчых (ён за кратамі ад 23 снежня) мае дзве крымінальныя справы — па артыкуле 366 Крымінальнага кодэкса (Гвалт ці пагроза гвалту службовай асобе) і па артыкуле 369 КК (Абраза прадстаўніка ўлады).
Адвакат Сяргей Красноў удакладніў, што і ў «новым» абвінавачанні пакуль няма канкрэтыкі — як менавіта Уладзімір Няпомняшчых абразіў пракурорку Алесю Жураўлёву і якім чынам ён ёй пагражаў.
«Уладзімір Міхайлавіч трымаецца бадзёра, дзякаваў усім за лісты і падтрымку. З нагоды новага абвінавачання ён толькі ўсміхнуўся — бо не памятае, каб абражаў ці пагражаў пракурорцы», — зазначыў адвакат.
11 студзеня ягоная жонка і суседка атрымалі лісты ад Няпомняшчых. Ён піша ў лісце суседцы: «Перамога будзе за святлом і праўдай. Цемра, якая агарнула Беларусь, хлусня, подласць і мярзота сыдуць — я ў гэтым упэўнены!»
