Мінадукацыі раіцца: а што, калі адмяніць у школе астраномію і ўвесці абавязковыя «Асновы праваслаўнай культуры» з 3 класа?
Міністэрства адукацыі выносіць на грамадскае абмеркаванне школьныя навучальныя планы.
Пакуль што ў 10-м класе школьнікі вывучаюць адну гадзіну на тыдзень чарчэнне, а ў 11-м класе — астраномію. Але чыноўнікі задумаліся, ці правільна гэта?
Міністр адукацыі Ігар Карпенка
Усім ахвотным прапануюць выбраць паміж рознымі варыянтамі.
Чарчэнне можна па-ранейшаму вывучаць усім, можна вывучаць без выстаўлення ацэнак, а можна зрабіць факультатывам.
Астраномію можна пакінуць абавязковым прадметам, а можна зрабіць факультатывам.
Калі ж вызваліць месца ў раскладзе, то можна іх напоўніць адным з двух факультатываў.
Факультатыў «Этыка і псіхалогія сямейнага жыцця» прапануецца зрабіць альбо абавязковым, альбо вывучаць па жаданні школьніка і яго бацькоў.
Іншая ідэя — зрабіць абавязковым факультатыў «Асновы праваслаўнай культуры». Тут таксама ёсць некалькі варыянтаў — пачаць абавязковае вывучэнне з трэцяга класа, пачаць абавязковае вывучэнне з пятага класа альбо пакінуць права выбару школьніку і бацькам.
Сваё меркаванне можна даслаць на электронны адрас [email protected] альбо праз тэлеграм-бот @MinEducat_bot (https://t.me/MinEducat_bot).
