Даслаць навіну
Знайсці
01.12.2020 / 19:51

Доктару Айзатуліну, які займаўся з праблемнымі дзеткамі, не працягнулі кантракт у РНПЦ траўматалогіі і артапедыі

Павялічыць

Рустам Айзатулін.

Акрамя асноўнай працы ў РНПЦ, доктар Айзатулін займаецца зь неданошанымі немаўлятамі, дзецьмі з рэдкімі спадчыннымі нэйрамышачнымі захворваньнямі, працуе над стварэньнем базы такіх пацыентаў, піша Радыё Свабода.

Рустаму Айзатуліну з 1 студзеня не працягнулі кантракт у РНПЦ траўматалёгіі і артапэдыі. Прычым кіраўніцтва РНПЦ зь ім не сустракалася, супрацоўніца аддзелу кадраў прынесла паперку, якую прапанавала падпісаць, расказаў Свабодзе Рустам Айзатулін.

«Спачатку вынесьлі папярэджаньне за пасты ў фэйсбуку»

«У жніўні ў мяне было шмат пастоў у фэйсбуку. Мяне выклікалі ў Мінздароўя на размову і вынесьлі папярэджаньне за пасты ў фэйсбуку. Ніякіх затрыманьняў мяне падчас акцый ніколі не было. Толькі пасты ў фэйсбуку. Цяпер дачакаліся сканчэньня кантракту.

Мне сказалі, што фінансаваньне Мінздароўя на наступны год скарачаецца, супрацоўнікаў хапае, таму проста не працягваюць кантракт. І далі падпісаць паперу, што я працую да 31 сьнежня. Ніякіх размоў, тлумачэньняў не было.

Я напісаў службовую запіску кіраўніцтву — адказу не атрымаў. Задаваць пытаньні кіраўніцтву і Мінздароўя цалкам бессэнсоўна — атрымаем адпіскі.

Хадзіць, упрошваць нікога не хачу, буду звальняцца», — расказаў Рустам Рустамавіч.

Доктар Айзатулін працуе ў РНПЦ з 2008 году. Прыйшоў сюды ў клінічную ардынатуру пасьля Менскага дзяржаўнага мэдычнага ўнівэрсытэту, тут і застаўся працаваць. Асноўныя навуковыя і практычныя інтарэсы — траўматалёгія і артапэдыя: остэасінтэз пераломаў костак шкілета ў дзяцей і дарослых; карэкцыя восевых дэфармацый ніжніх канечнасьцяў (часовае блякаваньне зон росту, выкарыстаньне апаратаў зьнешняй фіксацыі); кансэрватыўнае і апэратыўнае лячэньне касалапасьці і яе рэцыдываў, дэфармацый стапы ды іншыя.

Апякуецца неданошанымі дзеткамі, пацыентамі з рэдкімі генэтычнымі хваробамі

Рустам Айзатулін таксама зьяўляецца кансультантам у Рэспубліканскім грамадзкім аб’яднаньні бацькоў неданошаных дзяцей «РАНО»; у дабрачынным грамадзкім аб’яднаньні «Геном», у грамадзкім аб’яднаньні людзей зь недасканалым остэагенэзам «Крохкае побач»; пастаянна кансультуе пацыентаў дзіцячага хосьпісу.

«Гэта мой асабісты інтарэс. Мне падабаюцца гэтыя дзеткі. Ніякай фінансавай зацікаўленасьці тут няма, бо гэтыя бацькі, у якіх неданошаныя дзеткі, дзеткі са СМА ды іншымі рэдкімі хваробамі, і так няшчасныя.

У мяне менавіта навуковы інтарэс і надзея на тое, што калі-небудзь і ў нас пачнецца сур’ёзная праца, зьявяцца напрацоўкі па аказаньні дапамогі такім дзеткам — каб былі пратаколы лячэньня, дыягностыкі, мэддапамогі, як ва ўсіх цывілізаваных краінах.

База вялікая для прасоўваньня гэтага накірунку ўжо ёсьць, дзеткі ўсе абсьледаваныя, здымкі паробленыя, патрэба ў артапэдычных апэрацыях ёсьць.

Мы працуем разам з РНПЦ «Маці і дзіця, з рэаніматолягам-нэанатолягам Андрэем Вітушкам перасякаемся па зоне інтарэсаў», — кажа Рустам Айзатулін.

Дар’я Царык, намесьніца дырэктара пацыенцкай арганізацыі «Геном», якая дапамагае дзеткам са СМА, піша на сваёй старонцы ў фэйсбуку:

«Ну як жа так? Адзіны спэцыяліст у Беларусі, хто столькі ўклаў у вывучэньне тэмы «артапэдыя дзетак са спадчыннымі нэйрамышачнымі захворваньнямі», адзіны, да каго накіроўвалі ўсіх і заўсёды і без каго складана (немагчыма) прадставіць вядзеньне СМА і хваробы Дюшэна ў рамках мультыдысцыплінарнай каманды. Думаю, тут і Рэспубліканскае грамадзкае аб’яднаньне бацькоў неданошаных дзяцей РАНО, «Я РЕТТ» далучацца.

Ну як жа так, а як жа пацыенты? Можна было б пытацца. Але, вядома ж, адказ адзін, у гэтай і ўсіх іншых гісторыях папулярных сёньня звальненьняў: бяда гэтая толькі для пацыентаў, а дзяржава вырашае і вырашала іншыя задачы».

«Ня ведаю пакуль, дзе буду працаваць»

Пакуль Рустам Айзатулін яшчэ ня вызначыўся: або будзе шукаць працу ў Беларусі, або давядзецца зьехаць за мяжу.

«Ня ведаю пакуль, дзе буду працаваць. Што тычыцца працаўладкаваньня ў камэрцыйных цэнтрах — тут таксама ўсё можа быць. Як было з адным доктарам, які звольніўся з так званай «лечкамісіі» і ўладкаваўся ў камэрцыйны мэдцэнтар «ЛОДЭ», а праз пару дзён патэлефанавалі «зьверху» і загадалі звольніць. Цяпер ён шукае магчымасьць зьехаць», — разважае Рустам Айзатулін.

Доктар не выключае, што давядзецца шукаць працу за мяжой.

Радыё Свабода

Хочаш падзяліцца важнай інфармацыяй
ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2020 2021 2022
снежань студзень люты
ПН АЎ СР ЧЦ ПТ СБ НД
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31