Эксперт: Лаўроў будзе гаварыць з Лукашэнкам пра датэрміновыя выбары
Міністр замежных спраў РФ Сяргей Лаўроў у чацвер сустрэнецца з Аляксандрам Лукашэнкам і Уладзімірам Макеем у рамках рабочага візіту ў Мінск. Напярэдадні вечарам ён прыбыў у беларускую сталіцу для ўдзелу ў пасяджэнні калегій МЗС дзвюх краін.
Падчас калегіі бакі будуць вымушаныя надаць увагу сітуацыі ў Беларусі, дзе ўжо больш за тры месяцы адбываюцца масавыя пратэсты пасля прэзідэнцкіх выбараў.
Кіраўнік Цэнтра беларускіх даследаванняў Інстытута Еўропы РАН Мікалай Мяжэвіч у размове з ТАСС выказаў меркаванне, што з-за ўнутранай сітуацыі пытанні паглыблення інтэграцыі РФ і Беларусі падчас перамоваў, хутчэй за ўсё, адыдуць на другі план. Для інтэграцыі, па яго словах, патрэбны стабільны стан. Таму, працягнуў эксперт, «перамовы будуць у большай ступені тычыцца перспектыў выхаду беларускай улады і беларускага грамадства з палітычнага тупіку».
Намеснік дырэктара Інстытута краін СНД Уладзімір Жарыхін не выключыў, што Лаўроў падчас візіту завострыць увагу менавіта на неабходнасці правядзення канстытуцыйнай рэформы. Прадстаўнікі Расіі не раз падкрэслівалі, што ў першую чаргу неабходна выконваць тое, што абяцана: праводзіць канстытуцыйную рэформу і датэрміновыя выбары. «Усе ад Лукашэнкі гэтага і чакаюць, значная частка беларускага насельніцтва і, уласна, расійскае кіраўніцтва таксама лічаць, што без гэтага не абысціся», — адзначыў эксперт, дадаўшы пры гэтым, што перамовы ў Мінску наўрад ці будуць праходзіць у крытычнай плоскасці.
