Святароў Навагрудскай епархіі абавязалі не ўдзельнічаць у мітынгах і не выказваць «палітычных меркаванняў»
Архіепіскап Навагрудскі і Слонімскі Гурый падпісаў распараджэнне, згодна з якім святарам епархіі вызначана не ўдзельнічаць у мітынгах, а таксама не выказваць сваё палітычнае меркаванне, у тым ліку і ў сеціве, піша Tut.by.
Дакумент датуецца 23 лістапада і прыняты пасля нарады архірэяў Беларускай праваслаўнай царквы, якая прайшла 19 лістапада ў Мінску. Там святары абмяркоўвалі пытанні, звязаныя з царкоўным жыццём і духоўнай адукацыяй.
У распараджэнні архіепіскапа Навагрудскага і Слонімскага Гурыя гаворыцца пра тое, што святарам Навагрудскай епархіі вызначана не браць удзел у палітычных акцыях, выступах (у тым ліку і не выказваць «палітычных меркаванняў у інтэрнэт-прасторы»), мітынгах, страйках і шэсцях. Святары павінны памятаць, што «галоўны абавязак духавенства складаецца са здзяйснення набажэнстваў, таінстваў і малітвы, у тым ліку аб супакаенні варагуючых і дараванні міру і дабрабыту беларускаму народу».
Нагадаем, на мінулым тыдні Генеральная пракуратура абвясціла афіцыйныя папярэджанні біскупу Мінска-Магілёўскай архідыяцэзіі Юрыю Касабуцкаму і прэс-сакратару БПЦ Сяргею Лепіну за іх допісы ў сацыяльных сетках, у якіх святары выказаліся наконт разбурэння мемарыяла Рамана Бандарэнкі.
«Даць ацэнку гэтым заявам» кіраўніку сваёй адміністрацыі сумесна з генпракурорам даручыў Аляксандр Лукашэнка.
