У «Народнай волі» канфіскавалі ўвесь сённяшні наклад
Журналістка Марына Коктыш паведаміла, што ў рэдакцыі газеты прыйшлі невядомыя без дакументаў. Затрымалі кіроўцу, які прывёз газеты, і двух валанцёраў. У выніку быў канфіскаваны ўвесь наклад.
«У нас забралі ўвесь наклад газеты. Учора ў нашай друкарні былі вялікія праблемы. Ім пагражалі, каб яны не друкавалі нашу газету. Нягледзячы ні на што, тыраж надрукавалі. Мы яго даставілі ў Мінск. Як толькі машына прывезла ўвесь наклад сённяшняга нумара «Народнай волі» — 25 тыс., да нас прыйшлі некалькі чалавек у цывільным. Яны не прадставіліся, не далі ніякіх папераў, ніякіх тлумачэнняў. Затрымалі кіроўцу, які прывёз наклад — таксама без усялякіх падставаў. Затрымалі двух валанцёраў. Выклікалі АМАП, і АМАП пагрузіў без усялякіх папераў, без усялякіх падставаў, без усялякіх тлумачэнняў усе газеты, што мы надрукавалі, і звёз у невядомым кірунку. У нашай краіне закон больш не працуе. Мы нават не ведаем, хто гэта», — расказала Марына Коктыш.
Нагадаем, што са жніўня газета друкуецца ў Расіі і распаўсюджваецца валанцёрамі. У кіёскі «Белдрука» яна не паступае і не распаўсюджваецца Белпоштай.
