Школьніка з Жабінкі пакаралі за кінуты ў міліцэйскую машыну кактэйль Молатава
Два з паловай гады абмежавання волі без накіравання ў выпраўленчую ўстанову атрымаў школьнік з Жабінкі. Пра гэта паведаміла ў панядзелак пракуратура Брэсцкай вобласці.
Паводле следства, 11 жніўня 17-гадовы школьнік у гарадскім парку набыў пляшку з запальнай сумессю і пасля кінуў яе ў супрацоўніка Жабінкаўскага РАУС. Прадмет упаў каля службовага аўтамабіля і загарэўся.
Падлетак пазней растлумачыў, што ў той дзень гуляў каля плошчы, дзе праходзіла масавае мерапрыемства. Жадаючы перашкодзіць працы супрацоўнікаў міліцыі, ён кінуў бутэльку з запальнай сумессю ў бок службовага аўтамабіля, пасля чаго ўцёк. Затым падлетак напісаў яўку з павіннай.
«Прысуд не ўступіў у законную сілу, можа быць абскарджаны і апратэставаны ў апеляцыйным парадку», — адзначылі ў пракуратуры.
