Лёгкаатлета Андрэя Краўчанку і кікбаксёра Івана Ганіна, затрыманых у цэнтры Мінска, перавялі ў Жодзіна
Лёгкаатлет Андрэй Краўчанка і кікбаксёр Іван Ганін былі пераведзеныя ў жодзінскае СІЗА з РУУС Цэнтральнага раёна Мінска, паведамляе Tribuna.com.
Нагадаем, іх затрымалі ў нядзелю. У момант затрымання яны знаходзіліся ў машыне на адной з парковак у цэнтры Мінска.
Паводле сведчанняў відавочцаў, затрыманне адбывалася жорстка і суправаджалася крыкамі «Хочаш як ва Украіне?» і « А што ты, #### [нядобры чалавек], сабе думаў!?». Рукі спартсменам адразу зацягнулі будаўнічымі сцяжкамі.
Ноччу з'явілася інфармацыя аб тым, што спартсменаў адпусцілі. Аднак яна не пацвердзілася.
Нагадаем, Краўчанка адным з першых падпісаў ліст за сумленныя выбары і супраць гвалту. Ганін таксама сярод падпісантаў. Абодва спартсмены ўваходзяць у свабоднае аб'яднанне спартсменаў SOS_BY.