Украіна адмовілася ад паставак электраэнергіі з Беларусі ў 2021 годзе
Міністэрства энергетыкі Украіны падрыхтавала праект прагнознага балансу электрычнай энергіі на 2021 год, у якім не прадугледжана паставак электраэнергіі з Беларусі і Расіі, піша «Радыё Свабода».
Аб’яднаная энергетычная сістэма Украіны будзе генераваць электрычнасць на сваіх атамных, гідра- і цеплаэлектрастанцыях, а таксама сонечную і ветравую на альтэрнатыўных магутнасцях. Паводле папярэдніх планаў, Украіна мае намер захаваць імпарт электраэнергіі з іншых еўрапейскіх краін, у тым ліку са Славакіі і Венгрыі.
Раней Беларусь была сярод найбуйнейшых пастаўшчыкоў электраэнергіі ва Украіну.
Летась Украіна планавала закупіць у 2020 годзе ў Беларусі 2,1 мільярда кілават-гадзін электраэнергіі і звязвала гэтыя планы з запускам Беларускай АЭС. Пры гэтым у Кіеве падкрэслівалі, што такія пастаўкі будуць ажыццяўляцца выключна на ўнутраны рынак, а не для далейшага рээкспарту.
