Качанава сцвярджае, што людзі са штаба Бабарыкі прапаноўвалі пералічыць галасы ў абмен на спыненне пратэстаў
На сустрэчы са студэнтамі БДУ 3 лістапада кіраўнік Савета Рэспублікі Наталля Качанава заявіла, што на яе «выйшлі пэўныя людзі са штаба Бабарыкі і ўсіх астатніх і прапанавалі: мы спынім гэтыя акцыі, калі вы пералічыце галасы».
— Прэзідэнт кажа: «Адназначна, пералічваем». На наступны вечар яны кажуць: «Не, адставіць. Гэта ўжо не актуальна». Таму ведаеце, хлопцы, вы шмат чаго не ведаеце, — сказала Наталля Качанава студэнтам.
Штаб Віктара Бабарыкі абверг словы Наталлі Качанавай пра тое, што нехта з каманды звязваўся са старшынёй Савета Рэспублікі і прасіў пералічыць галасы выбаршчыкаў на прэзідэнцкіх выбарах у абмен на спыненне акцый пратэсту.
— Такога не было. Штаб Бабарыкі не тэлефанаваў і не размаўляў з Качанавай ні да, ні пасля выбараў, — заявілі Tut.by у штабе экс-прэтэндэнта на пасаду прэзідэнта.
