Знайсці
02.10.2020 / 09:461РусŁacБел

Што мы слухалі ў верасні — дзесяць найцікавейшых альбомаў месяца АЎДЫЯ

Пасля перапынку, выкліканага падзеямі ў краіне, вяртаем традыцыйны агляд найлепшых, на наш погляд, музычных рэлізаў месяца. 

Tricky — Fall to Pieces

Чатырнаццаты студыйны альбом выбітнага трып-хоп музыкі выпушчаны на яго ўласным лэйбле. Па словах Tricky, «Fall To Pieces» прысвечаны ўнутранай барацьбе чалавека з самім сабой у цяжкія часы. І гэта невыпадкова.

У маі 2020 года памерла 24-гадовая дачка музыкі, якая таксама была артысткай. Пасля трагедыі Tricky заявіў, што ў той дзень ягоны свет скончыўся. 

Parov Stelar — Voodoo Sonic The Trilogy, Pt. 3

Аўстрыйскі дыджэй Маркус Фюрэдэр, які ўзяў псеўданім Parov Stelar, у сваёй творчасці выкарыстоўвае сумесь джазу, хаўсу, электра і брэйкбіту.

Вашай увазе — трэцяя частка альбомнай трылогіі, створаная ў непаўторным стылі з арыгінальным спалучэннем музычных жанраў.

Hurts — Faith

Пасля выхаду папярэдняга альбома музыкі адчувалі сябе настолькі выматанымі, што не былі ўпэўненыя, што ў іх выйдзе яшчэ адзін альбом.

Але яны рызыкнулі, і гэта аказаліся вартыя таго высілкі. Па сцверджанні саміх Hurts, яны вярнуліся да стылю ранніх альбомаў і засумавалі па меланхоліі. Суму і пакут на пятым рэлізе гурта і напраўду дастаткова, але смутак можа быць светлым і нават аптымістычным.

Marilyn Manson — We Are Chaos

Мэрылін Мэнсан называе плытку сваім «роздумам аб няпростых цяперашніх часах», маючы на ​​ўвазе ўсе падзеі гэтага года.

Ён, як паэт, разважае пра хаос, злучаючы ў гучанні глэм-, індастрыял- і альтэрнатыўны метал. «Я спрабаваў намаляваць хаос словамі, а прадзюсар — гукамі, каб вы маглі бачыць і чуць усю сваю тугу і роспач».

ЛСП — Свиное Рыло ды One More City

У верасні беларускі гурт ЛСП выпусціў адразу два альбомы. З іх рэлізамі выйшла даволі цікавая гісторыя.

11 верасня выйшаў рэп-мюзікл «Свіное рыла». Па сюжэце падзеі альбома адбываюцца ў Свінскім Саюзе ў часы «пігібудовы». Галоўныя дзейныя героі «казкі» — тры дзікі: Свін, Сніф і Снаф. Яны гандлююць жалудамі, а потым раптам становяцца зоркамі. Да іх прыходзіць воўк у пагонах па мянушцы Брудны Рубель, які страхуе тэрыторыю — і пачынаецца экшн.

Фанаты вельмі неадназначна ўспрынялі навінку і пачалі будаваць здагадкі, што выйдзе яшчэ адзін, «сапраўдны» альбом. Сапраўды, праз тыдзень пасля «Свінога рыла» выйшаў альбом «One More City».

Télépopmusik — Everybody Breaks the Line

Французы Télépopmusik за чвэрць стагоддзя сваёй сцэнічнай дзейнасці выпусцілі ўсяго два поўнафарматныя альбомы і дзясятак сінглаў, але змаглі стаць шырока вядомымі і нават культавымі ў электронных колах, зарабіўшы славу класікаў сучаснага даўнтэмпа.

У верасні пабачыў свет першы за 15 год рэліз французскіх электроншчыкаў.

Joji — Nectar

Памятаеце флэш-моб Harlem Shake? Ён распачаўся з відэа, на якім былі чатыры чалавекі, аднаго з якіх звалі Джордж Мілер.

Джордж Мілер быў відэаблогерам, ён здымаў трэшовыя ролікі, якія набіралі шалёную колькасць праглядаў. Але Joji закінуў кар'еру блогера і заняўся музыкай. Сёння мы ведаем яго як аднаго з найбольш папулярных R&B-выканаўцаў. 

Idles — Ultra Mono

Трэці альбом панкаў з Брысталя, у якім яны працягваюць разважаць пра станоўчы і адмоўны бакі поспеху, а таксама пра сацыяльныя праблемы сённяшняга грамадства.

Крытыкі наколькі па-рознаму ставяцца да самога гурта, настолькі і падзяліліся водгукі пра рэліз. Але ўсе сходзяцца ў адным — энергія Idles нікуды не падзелася.

Deftones — Ohms

У адрозненне ад папярэдняга рэлізу, у дачыненні да новага альбома культавых Deftones усе сышліся ў адзіным меркаванні — гэта адзін з найлепшых альбомаў года. На метал-сцэне, магчыма, і проста найлепшы.

Можна па-рознаму ставіцца да Deftones, але лепш за іх наўрад ці нехта мог бы праспяваць і сыграць пра 2020 год.

А што слухалі вы? Пішыце ў каментарах.

Піліп Каваленка

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера