Макрон прапанаваў Лукашэнку добраахвотна сысці са сваёй пасады
Аляксандру Лукашэнку варта добраахвотна сысці са сваёй пасады. Такую заяву зрабіў французскі лідар Эманюэль Макрон у інтэрв'ю газеце Le Journal du Dimanche, піша РБК.
Па словах Макрона, у Беларусі цяпер працягваецца крызіс аўтарытарнай улады, якая не здольная зразумець логіку дэмакратыі. «Відавочна, што Лукашэнка павінен сысці», — заявіў прэзідэнт Францыі.
Макрон распавёў, што размаўляў з расійскім прэзідэнтам Уладзімірам Пуціным 14 верасня перад яго сустрэчай з Лукашэнкам у Сочы. «Я сказаў яму, што Расія павінна адыграць сваю ролю, і гэтая роля можа быць станоўчай, калі яна падштурхне Лукашэнку да павагі выбарчага права і вызвалення палітычных зняволеных», — растлумачыў прэзідэнт.
Макрон выказаў захапленне беларускімі дэманстрантамі, якія кожныя выхадныя выходзяць на пратэстныя акцыі. «Асаблівую павагу выклікаюць жанчыны, якія праводзяць шэсці кожную суботу», — адзначыў ён.
