Суд апраўдаў аднаго з затрыманых пасля Маршу справядлівасці
46-гадовага Леаніда Ш. (мужчына папрасіў не ўказваць імя) схапілі падчас зачысткі праспекта Незалежнасці пасля нядзельнага маршу.
«Я ў нядзелю быў ля Акадэміі Навук — ішоў купіць квіткі ў кінатэатры «Кастрычнік», хацеў жонку звадзіць. Гэта быў вечар, прыкладна 18:30.
Я падыходзіў да пераходу, там было шмат людзей. І раптам пад’ехалі аўтазакі, людзі пабеглі. Я ў шоку таксама пабег — а што было рабіць? Я разгубіўся і ўвогуле не чакаў такога развіцця падзей.
Усіх схапілі. Ну і мяне таксама».
Пасля Леаніда разам з іншымі затрыманымі даставілі ў Ленінскае РАУС.
«Склалі пратаколы, што я быў удзельнікам мітынгу, крычаў, супраціўляўся пры затрыманні. Я напісаў, што з пратаколам не згодны, што мяне ўзялі выпадкова, — кажа мужчына. — Але хачу адзначыць, што ў міліцыі адэкватна ставіліся, прапаноўвалі і ваду, і ў прыбіральню».
Пасля Леаніда адвезлі ў Жодзіна. У панядзелак быў суд.
«Я на судзе сказаў: у мяне заступнікаў няма, ні сведкаў, ні адваката. Буду абараняць сябе сам.
Суддзя выслухала мае паказанні, сказала, што яны адэкватныя і што з боку праваахоўчых органаў не хапае доказаў маёй віны. Мяне апраўдалі.
Усё было хутка, суд ішоў хвілін 10-15. На ім выслухалі толькі мяне, сведкі з боку міліцыі не выступалі.
Мяне вызвалілі, валанцёры сустрэлі і адвезлі дадому», — згадвае Леанід.
Як сам мужчына ставіцца да мітынгаў?
«Неспакойна сёння. Я не разумею, чым сітуацыя скончыцца, але хачу, каб усё разрулілася нарэшце. Галоўнае — мірным шляхам», — кажа Леанід.
