Пісьменніца Людміла Рублеўская таксама сышла з «Советской Белоруссіі»
velcom Smartfilm
Гэтую інфармацыю яна пацвердзіла TUT.BY.
Па словах Рублеўскай, гэта адбылося яшчэ месяц таму. Сапраўды, апошнія публікацыі Людмілы на сайце выдання датаваныя 14 жніўня.
Ад каментароў Людміла Іванаўна адмовілася.
У «СБ. Беларусь сёння» Рублеўская працавала літаратурным аглядальнікам з 2003 года. Цяпер яе тэксты з'яўляюцца на сайце газеты «Звязда». Так, сёння газета анансавала прэм'еру яе рубрыкі «Прывіды беларускіх муроў».
Акрамя Рублеўскай, з выдання за апошнія два месяцы сышлі і іншыя супрацоўнікі. З пачатку жніўня звольніліся чатыры супрацоўнікі Выдавецкага дома «Беларусь сегодня», якія працавалі ў навінавым аддзеле сайта sb.by. Гэта Аліна Янчур, Аляксандр Кастыка, Вадзім Шундалаў і Святлана Галуза. Таксама супрацоўніцтва з СБ спыніў пісьменнік Уладзімір Сцяпан, які ў гэтым годзе атрымаў Нацыянальную літаратурную прэмію як найлепшы беларускі празаік.
13-14 жніўня былі апублікаваныя апошнія артыкулы журналістаў Канстанціна Бакуна, Людмілы Габасавай і Вольгі Пасіяк. Таксама з выдання сышла Юлія Васілішына. Інфармацыю пра гэта пацвердзіў яе муж Раман Рудзь, рэдактар аддзела расследаванняў «СБ. Беларусь сегодня».
