Знайсці
12.08.2020 / 14:562РусŁacБел

Што адбываецца, калі трапляеш у аўтазак

Рэдактар By.tribuna.com Максім Беразінскі, вызвалены сёння, расказаў НН, што было з ім пасля затрымання.

Максім Беразінскі

Машыну, у якой ён ехаў з сябрамі, каля 20-й гадзіны ўчора спыніла ДАІ на выездзе з плошчы Незалежнасці, насупраць Педагагічнага ўніверсітэта.

«У мяне на аўто быў сцяжок. Даішнік пачаў складаць пратакол за тое, што я сігналіў. Хоць у мяне даўно не працуе сігнал у машыне, — кажа Беразінскі.

— Пасля пад'ехаў сіні бусік з амапам і нас усіх загрузілі туды. Машына так і засталася стаяць. Пасля з бусіка перавялі ў аўтазак і гадзіны дзве мы стаялі ў аўтазаку на Нямізе. Гэта быў аўтазак са «стаканамі», мы ў «стакане» былі ўдвох — мякка кажучы, было цеснавата.

Пасля аўтазак паехаў у Ленінскі РУУС.

Па дарозе загрузілі яшчэ веласіпедыста, які проста ехаў па веласіпеднай дарожцы. Пасля схапілі яшчэ рабочых ці то з Кобрына, ці то з Пінска — чалавек сем цесляроў. Яны робяць рамонт у будынку на вуліцы Маркса і вярталіся да сябе ў інтэрнат з сумкамі.

У іх у сумках былі пажыткі, у тым ліку нажы, кілбасу рэзаць. Дык амапаўцы крычалі: «Мы вам зараз гэтыя нажы ў ж… засунем!»

Пабілі трохі ў аўтазаку. Прыгаворвалі: «Вы хацелі краіну для жыцця? Вось вам краіна для жыцця! Колькі вам заплацілі?» Амапаўцы ўпэўненыя, што акцыі праплачаныя, што іх каардынуюць з-за мяжы і г.д.

Прывезлі ў РУУС, пабілі трохі там. Паставілі да сценкі ў двары. Пасля перавялі ў аўтамабільны гараж. Усяго ў Ленінскі, з размоў міліцыянтаў, за ноч прывезлі 110 чалавек.

Частку забрала «хуткая» — былі людзі з чэрапна-мазгавымі траўмамі, параненыя гумовымі кулямі.

Па факце засталося каля 80 чалавек.

Мы ўсю ноч стаялі на нагах у гаражы. У нашым аддзяленні ахоўвала міліцыя, дык хоць вадзілі ў прыбіральню і дазвалялі прысесці на бетонную падлогу. Суседняе аддзяленне ахоўваў амап, там, казалі, не дазвалялі нічога.

Пятнаццаць гадзін мы прастаялі на нагах.

Сёння ўсіх загрузілі ў тры аўтазакі і павезлі на Акрэсціна. Пяць чалавек адпусцілі а 13.30, у тым ліку мяне. Мае таварышы атрымалі суткі, я — павестку ў суд без даты.

Дзе цяпер мая машына — невядома», — расказаў Беразінскі.

NN.by

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера