«Дзейнічайце па законе». Ціханоўская выступіла з новым зваротам да выбарцаў і праваахоўных органаў
Кандыдат у прэзідэнты Святлана Ціханоўская выступіла з новым зваротам.
«З болем у сэрцы мы чыталі ўчора навіны, у якіх паведамлялася пра тое, як супрацоўнікі АМАП і міліцыі затрымлівалі веласіпедыстаў. Мы просім улады апамятацца, мы просім зірнуць на каляндар, цяпер 2020 год, а не сярэднявечча. Такія метады барацьбы з нязгоднымі не тое што непрымальныя — яны па-за межамі».
Святлана Ціханоўская заклікае сілавыя структуры не выконваць злачынных загадаў. «Беларусы цэняць і паважаюць вас, для беларусаў гэта абаронцы, а не пагроза іх жыццю».
«Тысячы беларусаў выходзяць на вуліцы гарадоў і кажуць: нам патрэбныя перамены. Столькі прыхільнікаў перамен на вуліцах яшчэ не было».
Ціханоўская заклікала выбарцаў прыйсці 9 жніўня на выбарчыя ўчасткі і прагаласаваць за яе.
«А 20-й гадзіне вы маеце права прыйсці на ўчасткі і азнаёміцца з пратаколам. Чакайце, калі камісія палічыць галасы і вывесіць выніковы пратакол. Калі вы пабачыце, што мы перамаглі — святкуйце нашу перамогу.
Калі вы заўважылі парушэнні, дзейнічайце па законе, выклікайце міліцыі і патрабуйце правесці праверку. Гэта вашы галасы на ўчастку, менавіта на вашым участку можа прайсці фальсіфікацыя. І менавіта вы можаце зрабіць захады, каб прадухіліць злачынства ці хаванне доказаў.
Я буду рабіць усё, што залежыць ад мяне, каб абараніць вашы галасы», — кажа Ціханоўская і зазначае, што пад відэа будуць размешчаныя падрабязныя юрыдычныя крокі.
«Нас большасць і нам не патрэбная кроў», — падкрэслівае Святлана.
