МЗС Літвы: Важны не дзень выбараў у Беларусі, а першы дзень пасля выбараў
Лінас Лінкявірус. Фота Надзеі Бужан
Міністр замежных спраў Літвы Лінас Лінкявічус заявіў, што важны не столькі сам дзень выбараў прэзідэнта ў Беларусі, колькі першы дзень пасля гэтых выбараў, паведамляе Delfi.lt.
«Дзень пасля выбараў і з'яўляецца самым важным. На сам дзень выбараў я не рабіў бы прагнозаў, што можа здарыцца нешта асаблівае. ( … ) Важны першы дзень пасля выбараў, калі будуць абвешчаныя вынікі. Тады вельмі важная рэакцыя ўлады і апазіцыі на гэтыя вынікі. Вось тады і будзе відаць, наколькі грамадства саспела для гэтага павароту, пераменаў, што мацнейшае: страх або немагчымасць далей жыць у тых умовах, якія ёсць цяпер. Гэта ўжо будзе залежаць ад саміх жыхароў Беларусі, і сапраўды толькі яны самі могуць вырашаць», — заявіў у чацвер радыёстанцыі Ziniu radijas Лінас Лінкявічус.
Падобную заклапочанасць міністр выказаў і некалькі дзён таму ў размове па тэлефоне з міністрам замежных спраў Беларусі Уладзімірам Макеем.
Лінкявічус таксама лічыць, што прэзідэнцкія выбары ў Беларусі праходзяць непразрыста, без выканання міжнародных прававых нормаў.
Літва, адзначыў міністр, уважліва назірае за сітуацыяй у суседняй краіне, атрымлівае інфармацыю і ад уладаў, і ад прадстаўнікоў апазіцыі.
«Адзінае наша чаканне і патрабаванне, каб не выкарыстоўваліся залішнія сілы, а таксама гвалт супраць дэманстрантаў, прадстаўнікоў апазіцыі, бо, магчыма, гэта будзе адбывацца пад прыкрыццём менавіта абароны ад знешняга ворага або ад нестабільнасці», — дадаў міністр.
