Даслаць навіну
Знайсці
29.07.2020 / 22:05 28

«Вы з гэтым пытаннем дзейнічаеце як правакатар». Замест Качанавай агітацыйную сустрэчу зноў правёў Крывашэеў

Давераныя асобы Аляксандра Лукашэнкі працягваюць замест яго сустракацца з выбаршчыкамі. У мінскай гімназіі №38 такую сустрэчу мусіла правесці Наталля Качанава — найбліжэйшая паплечніца дзеючага кіраўніка дзяржавы. 

Каля 6-й вечара актавая зала гімназіі была амаль поўная, на сустрэчу з чыноўніцай прышло з паўтары сотні чалавек, калі не больш.

Але замест Качанавай да людзей выйшаў тэлевядучы Андрэй Крывашэеў.

Павялічыць

«Надзвычайныя абставіны прывялі да таго, што Качанава на нарадзе Савета бяспекі з Лукашэнкам», — паведаміў ён, маючы на ўвазе затрыманне баевікоў з расійскай прыватнай кампаніі, пасля якога Лукашэнка правёў экстранную нараду.

І адразу ж Крывашэеў папалохаў аўдыторыю Украінай:

«Я прыкладна ўяўляю той сцэнар, які прывёў нашу суседку да канфлікту, які доўжыцца больш за Вялікую Айчынную вайну. Мне б не хацелася верыць, што такое магчыма ў Беларусі. Веру, што такое немагчыма, пра гэта сведчыць і імклівая рэакцыя ўлады. Знешнім сілам не атрымаецца паўплываць на выбары».

Пасля прыйшоў час пытанняў.

Адзін мужчына выказаўся пра заробкі: маўляў, не растуць ужо з дзясятак гадоў.

«Вы дзе працуеце?» — пацікавіўся Крывашэеў.

«Я баюся адказваць на гэтае пытанне», — шчыра адказаў суразмоўца, але пасля прызнаўся, што ён выкладчык.

Крывашэеў патлумачыў: невысокія зарплаты сапраўды праблема, але ж гэта часткова кампенсуецца сацыяльным пакетам, напрыклад, бясплатнай медыцынай. І сёння ў прыярытэце павышэнне заробкаў медыкам, якія паказалі вельмі добрыя вынікі ў барацьбе з каранавірусам. Наступныя пасля медыкаў будуць настаўнікі, выкладчыкі, выхавацелькі і нянечкі, запэўніў Крывашэеў. Пасля чаго нагадаў, што не ўсё так кепска: маўляў, развіццё закладзена ў большасць сфераў эканомікі, і многія галіны не стаяць на месцы.

Наступнае пытанне было ад маладога хлопца: пра белыя стужкі штаба Ціханоўскай.

«Як будзе ставіцца ўлада да людзей са стужкамі?»

«Гэты сімвал скрадзены ў прыхільнікаў Навальнага. І гэта спроба раскалоць грамадства, якая ні да чаго добрага не прывядзе», — адказаў Крывашэеў.

«Калі [ў Лукашэнкі на выбарах] афіцыйная лічба Ярмошынай будзе 70%, а фота бюлетэняў пакажа, што ёсць разбежка? Што будзе, калі пачнуцца хваляванні, як адрэагуе ўлада?» — спытаў усё той жа хлопец.

«Разбежка будзе вялікая, бо праект «Голас» — гэта правакацыя, каб падштурхнуць грамадзян да такога выніку. І вы з гэтым пытаннем дзейнічаеце як правакатар», — паведаміў Крывашэеў.

Павялічыць

«У нас сёння неспакойна, ёсць згодныя і нязгодныя. І хваляванні людзей можна было б зняць празрыстасцю таго ж галасавання, напрыклад. Ёсць жа ПВТ, ёсць платформа, якая засталася пасля перапісу. І калі будуць празрыстыя факты — не будзе пытанняў і напружанасці», — выказаўся іншы ўдзельнік сустрэчы. У адказ Крывашэеў нагадаў, што ў нас галасаванне таемнае.

«І ў іншых краінах вопыт паказвае, што электроннае галасаванне прасцей сфальсіфікаваць», — адказаў Крывашэеў.

«А чаму не паставіць камеры?»

«Навошта калі ёсць назіральнікі?» — спытаў Крывашэеў.

Павялічыць

«Якія там назіральнікі!..» — адмахнуўся мужчына.

«Навошта вы абражаеце 60 тысяч педагогаў? Я ім веру больш, чым любым правакатарам, якія збіраюць подпісы!» — завёўся Крывашэеў.

«97 працэнтаў…» — пачаў наступны чалавек.

«Гэта фэйк!» — імгненна перабіў Крывашэеў.

Але мужчына працягнуў пытанне: чаму не ўзялі ў выбарчыя камісіі незалежных членаў?

«Па-першае, якая розніца? Па-другое, мне казалі старшыні, што ад апазіцыі не прыходзілі заяўкі», — адказаў журналіст.

«Я сам падаваў. Але камісію сфармавалі з тых, хто лічыў галасы раней», — не здаваўся мужчына.

«Тых, хто меў вопыт!» — парыраваў Крывашэеў.

«А дзе такое ў заканадаўстве, што члены камісій мусяць мець вопыт?» — пачалі дзівіцца ўжо і іншыя людзі.

«У камісіі адбіраюць як і на працу: па вопыце і кампетэнцыі, — паведаміў Крывашэеў. І згадаў студэнта Гарварда: — Я сам больш давяраю педагогам і грамадзянам Беларусі, чым замежным студэнтам».

Павялічыць

Спыталі і пра каранавірус. Калі скараціць адказ Крывашэева, то мы амаль перамаглі, але ці будзе другая хваля — невядома.

Маладая настаўніца распавяла, што ў яе адпрацоўка ў гэтай гімназіі. Але дзе і як жыць? Здымаць кватэру дорага.

Крывашэеў у адказ чамусьці распавёў, што жыве з жонкай у арэнднай аднапакаёўцы ў Чыжоўцы і гэта не так і дорага, а пасля з’ехаў на агульныя расказы пра развіццё краіны.

«Як яна вырашыць кватэрнае пытанне? Ніяк! Выйдзе замуж хіба», — пачалі хіхікаць некаторыя кабеты ў зале.

«Чаму вы не агітуеце за прэзідэнта? Вы ж тут для гэтага», — спытаў наступны глядач, чым сарваў смех і апладысменты аўдыторыі. Пасля мужчына прывёў у прыклад выбары ў Польшчы, дзе разрыў паміж кандыдатамі быў мінімальны.

Але Крывашэеў адказаў, што палякі перадралі двухпартыйную сістэму ў ЗША.

«Вы хочаце, каб у нас таксама было дзве партыі, напрыклад, «Белая Русь» і ЛДПБ ці камуністы, і каб яны перадавалі ўладу адна адной?» — запытаў журналіст.

А пасля адзначыў, што і ў Польшчы не ўсё так гладка, прыгадаўшы самагубства лідара партыі «Самаабарона» Анджэя Лепера.

На гэта пачуліся крыкі: «А ў нас — Завадскі? А Ганчар дзе?»

На гэта Крывашэеў спакойна адказаў, што следства па гэтых справах закрыта.

Зайшла гутарка і пра пасадку Бабарыкі.

«БабарЫка, ці БабАрыка, ці БабарыкО, як там яго», — пачаў крыўляцца з націскам Крывашэеў, але яго абсяклі людзі: «Навошта абражаць? Нібыта вы не ведаеце, як прозвішча гучыць».

«Следства па справе аб фінансавых махінацыях ідзе з 2016 года, у ім удзельнічаюць 18 краін, для кантроля мы запрасілі Інтэрпал»,— тлумачыў Крывашэеў. Але некаторыя пачалі выкрыкваць: «У чым яго віна? Суд быў? Калі не, то чаму дзяржканалы выстаўляюць яго вінаватым?»

«Матэрыялы справы выклікаюць цікавасць, і таму Белтэлерадыёкампанія прыадкрывае частку звестак», — такім было тлумачэнне Крывашэева.

Спыталі ў яго і пра стаўленне да затрыманняў журналістаў «Радыё Свабода», «Еўрарадыё», «Белсата».

На гэта Крывашэеў адзначыў, што «Радыё Свабода» — гэта не незалежнае СМІ, а сродак прапаганды ЗША.

«А так я кепска стаўлюся да любых перашкодаў журналістам. Але журналіст мусіць следаваць заканадаўству і прынцыпам этыкі», — адказаў Крывашэеў і ўжо другі раз за вечар пачаў скардзіцца на «цкаванне і булінг» дзяржаўных журналістаў, якім людзі пачалі пісаць у сацыяльных сетках непрыемныя, мякка кажучы, рэчы. Маўляў, мы займаемся, усіх крыўдзіцеляў знойдуць і пакараюць. Таксама Крывашэеў падзівіўся: калі незалежных журналістаў хтосьці таксама крыўдзіць, чаму яны не прыходзяць у яго Саюз журналістаў па абарону? Маўляў, «хай амерыканскія ці польскія СМІ звяртаюцца, але прапаную ім аплаціць працу нашай камісіі па этыцы!»

Павялічыць

«Я захапляюся вашай мужнасцю, — пачала чарговае пытанне жанчына. — Вы любіце гэты народ?»

«Так», — адказаў Крывашэеў.

«Прашу памятаць пра гэта заўсёды», — параіла жанчына і спытала пра ўстаноўку камер фіксацыі на ўчастках — нядаўна была такая ініцыятыва, людзі былі гатовыя самі сабраць грошы на гэта.

«Не ведаю, наколькі гэта законна, калі людзі хочуць перадаць грошы — я «за», але распараджацца імі будзе выбарчая камісія на свой густ», — адказаў Крывашэеў.

Пасля сустрэча пачала пераўтварацца ў лёгкі балаган: людзі стаміліся, хтосьці ад спёкі, хтосьці ад абцякальных адказаў даверанай асобы. Пачаліся выкрыкі з месцаў, і мерапрыемства скончылі, прапанаваўшы затрымацца тым, хто яшчэ меў пытанні.

Але ж праз некалькі хвілін у актавай зале стала пуста. Хіба адна кабета затрымалася, каб адчытаць за кепскую барацьбу з каранавірусам, астатнія ж даволі хутка разышліся.

Самае цікавае на гэтых сустрэчах — як іх успрымаюць людзі. Аповедаў пра планы, праграму кандыдата, эканоміку, курс рубля няма — ды ніхто іх і не чакае. Пазіцыя прадстаўнікоў Лукашэнкі простая: паглядзіце, як усё добра, без яго ўсё будзе горш. Нават не «без яго» — прозвішча Лукашэнкі тут ніхто і не згадвае — пры любым адхіленні ад дзяржаўнага курса.

Для апанентаў улады такія сустрэчы — гэта магчымасць нарэшце задаць якое-ніякое вострае пытанне якому-ніякому прадстаўніку сістэмы. Калі пашанцуе — атрымаць які-ніякі адказ. А тыя, хто абыякавы да рэжыму ці згодны з ім, увогуле выкарыстоўваюць момант, каб падзяліцца сваімі набалелымі праблемамі кшталту жыллёвага пытання.

Павялічыць

Большасці ж прысутных — і на гэтай, і на мінулых сустрэчах у школах, — у прынцыпе, усё роўна. Іх задача — проста адседзець патрэбны час. Чаму так? Бо яны педагогі, тыя самыя, якім так давярае Крывашэеў. А педагогі ў Беларусі — гэта штосьці кшталту чалавечага аналага мантажнай пены: маўклівая маса, якой пры патрэбе можна запоўніць любыя пустоты. Гэтая маса пакорліва прымае любую форму: аўдыторыі на сустрэчы, гледачоў на канцэрце ці нават выбарчай камісіі. І самае сумнае, што самі педагогі даўно ўспрымаюць такое стаўленне да сябе як належнае.

Улад Швядовіч, фота Аляксандры Піліповіч-Сушчыц

Хочаш падзяліцца важнай інфармацыяй
ананімна і канфідэнцыйна?

0
Злюка / адказаць
30.07.2020 / 14:12
А где можно посмотреть график встреч с доверенными лицами действующего в Минске? Я бы сходила послушать- пообщаться ..... :)))
1
Клубничка / адказаць
30.07.2020 / 16:41
Тяжело отрабатывать свои 30 сребреников засланному казачку из Вологограда, даже  фиолетовый весь стал. А за оскорбления, при таком количестве свидетелей, нужно вызвать хоть раз милицию на этого популиста.
1
per aspera / адказаць
31.07.2020 / 00:30
Педагогі... Сапраўды сталі ў гэтай "краіне для жыцця" мантажнай пенай, што часам ператлела ўжо на гуано. Усе ведаюць, чаму: у "краіне для аднаго чалавека" няма патрэбы ў маладым і падрыхтаваным Настаўніку, высокаадукаваным Выкладчыку кафедры, у паважаным і сусветна шанаваным Прафесары. Яны самі сабе - праХВесары, самі зацвярджаюць тых, "патрэбных", кандыдатаў і праХВесараў. Раней казалі -" чырвоныя праХВесары", ну то зараз &акаўскія. Ад таго і ня дужа разумныя, якіх можна, як пену, затаўкаць у каршэнь на любое мерапрыемства. Польскія конкурсныя умовы для дактароў і дакт.хабілітаваных: вас возьмуць на працу, у праект, калі вы атрымалі ступень не раней за СЕМ ГАДОЎ. Астатнія - ідуць міма. ... У "краіне" , дзе кіруюць з дапамогай амона і кдб, чырвоны кандыдат з праХВесарам сядзяць на кафедрах, аж пакуль пясок не сыплецца - 20, 35, 55 гадоў пасля абароны, - як толькі што свежанькія!))
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2019 2020 2021
ПН АЎ СР ЧЦ ПТ СБ НД
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31