Пазняк: Цапкалу не арыштавалі, бо ў Мінску раскусілі план Масквы
Палітык Зянон Пазняк чарговы раз выказаўся аб прэзідэнцкіх выбарах і цяперашняй электаральнай кампаніі.
«Тэхналогія, якую рэалізавала Масква на выбарах ў Беларусі, аказалася даволі эфектыўнай», — піша ён.
Пазняк крытыкуе Цапкала і Калеснікаву, якія, нібыта, «падмялі пад сябе Ціханоўскую», якая цяпер кліча людзей на галасаванне.
«Усё так хутка і як быццам складна атрымалася, што стала зразумела — варыянт з жанчынамі і са штабамі быў запланаваны загадзя», — упэўнены палітык.
«Відаць варыянт прадугледжваў, што будуць арыштаваныя банкір і Цапкала. І тут іх падменяць жанчыны. Але, магчыма, адбылася ўцечка інфармацыі, у Мінску план раскусілі і Цапкалу не арыштавалі. Тым не менш варыянт пайшоў, і жонка Цапкалы як ні ў чым не бывала прадстаўляе свайго мужа і штаб свайго мужа ў «трыумвіраце», — такую карціну малюе Пазняк.
Палітык чарговы раз раскрытыкаваў заклік аб'яднанага штаба браць удзел у галасаванні.
