Паліцэйскаму, які забіў Джорджа Флойда, пагражае 40 гадоў турмы
Былому афіцэру Дэрэку Шовэну, які націснуў каленам на горла афраамерыканца Джорджа Флойда падчас затрымання, раней выстаўлялі абвінавачванні ў ненаўмысным забойстве другой ступені і забойстве трэцяй ступені. Цяпер следства лічыць, што ён вінаваты і ў здзяйсненні нападу (assault) трэцяй ступені цяжкасці, паведамляюць інфармагенцтвы.
Тром іншым паліцыянтам — двое з іх дапамагалі трымаць Флойда, а яшчэ адзін стаяў побач — выставілі абвінавачванні ў спрыянні і падбухторванні да забойства.
Толькі за забойства другой ступені Шовэна могуць асудзіць на 40 гадоў турмы. Такі ж тэрмін прадугледжаны за спрыянне ў такім злачынстве і падбухторванне да яго.
Заклад за вызваленне ўсіх чатырох паліцэйскіх павялічыўся да $1 млн.
Флойд быў затрыманы 25 мая ў горадзе Мінеапалісе. Яго западозрылі ў спробе разлічыцца фальшывымі грашыма ў краме. Момант затрымання паліцыяй зафіксавалі вулічныя камеры назірання, а таксама мінакі. На кадрах белыя паліцыянты павалілі Флойда на асфальт і ўтрымлівалі яго, адзін з іх паклаў калена яму на шыю, хоць Флойд казаў: «Я не магу дыхаць». Затрыманы страціў прытомнасць і быў шпіталізаваны, а пазней памёр.
Пасля смерці Флойда ў ЗША і іншых краінах пачаліся пратэсты. Фраза «Я не магу дыхаць» стала адным з іх лозунгаў. Паліцэйскіх, якія праводзілі затрыманне звольнілі. За тыдзень пратэстаў у ЗША ў некалькіх гарадах, у прыватнасці ў Нью-Ёрку і Вашынгтоне, абвясцілі каменданцкую гадзіну. Пратэстоўцы ладзілі пагромы і падпалы. У выніку сутыкненняў з паліцыяй загінулі не менш за 11 чалавек.