Ціханоўскі адказвае Лукашэнку: У мяне адно грамадзянства, іншых ніколі не было
Папулярны палітычны блогер Сяргей Ціханоўскі адказаў на крытыку Аляксандра Лукашэнкі ў яго адрас.
Нагадаем, сёння Лукашэнка выказаўся пра Ціханоўскага. «Мы ведаем, на чыіх машынах ён ездзіць, хто яго фінансуе. Мы ведаем, адкуль ён прыехаў, якое ў яго грамадзянства і іншае… Мы ўсё гэта ведаем. Ды я ўжо гляджу, мне даюць інфармацыю, ужо нашы людзі ўбачылі», — адзначыў Лукашэнка.
Фота Надзеі Бужан
«Маё прозвішча там не называецца, але намёк на мяне: «Мы ведаем, якое ў яго грамадзянства». Во інфармацыяй валодаюць, во аналітычную работу правялі! У мяне адно грамадзянства, іншых ніколі ў мяне не было. Адносна грошай — у мяне бізнэс з 2005 года, у мяне ёсць грошы», — адказаў карэспандэнту «Нашай Нівы» Ціханоўскі.
Варта дадаць, што Сяргей Ціханоўскі цяпер добра зарабляе як відэаблогер — на сёння ён адзін з самых папулярных ютубераў Беларусі. Паводле ацэнак экспертаў, да якіх звярталася «Наша Ніва», ад свайго відэаблога і з данатаў ён атрымлівае каля 3000 даляраў за месяц.
