Трамп ваюе з сацсеткамі
Прэзідэнт ЗША Дональд Трамп у чацвер падпісаў выканаўчы ўказ, які, як лічаць у Белым доме, дазволіць рэгуляваць дзейнасць сацсетак і пазбавіць іх абароны ад абвінавачванняў у паклёпе, піша bbc.com.
Дакумент, падпісаны Трампам, адмяняе дзеянне параграфа 230 дзеючага ў ЗША Акта, які вызначае нормы паводзін, у прыватнасці і ў сацыяльных сетках (Communications Decency Act). Гэта параграф вызваляе найбуйнейшыя тэхналагічныя кампаніі ад адказнасці за змест паведамленняў, змешчаных на створаных імі платформах. Такім чынам, кампаніі Twitter і Facebook, напрыклад, былі абароненыя ад магчымых судовых пазоваў па абвінавачваннях у паклёпе і абароне гонару і годнасці.
Летам мінулага года спроба адміністрацыі прадставіць падобны ўказ правалілася пасля таго, як прадстаўнікі Федэральнай камісіі па гандлі і Федэральнай камісіі па камунікацыях выказалі пратэст, заявіўшы, што падобны крок ператварае Белы дом у «паліцэйскае падраздзяленне». Гэта незалежныя органы, і яны не падпарадкоўваюцца прэзідэнту.
Раней «Твітар» пазначыў два твіты Трампа як не адпаведныя фактам.
Эксперты сумняюцца, што прэзідэнт ЗША можа сваім указам спыніць дзеянне 230-га параграфа Акта, прынятага ў 1996 годзе. Большасць з іх сыходзяцца ў тым, што рашэнне прэзідэнта неадкладна будзе аспрэчана ў судзе.
Тым не менш, новая ініцыятыва Белага дома можа прымусіць найбуйнейшыя тэхналагічныя кампаніі, у тым ліку Twitter, Facebook і Google больш агрэсіўна мадэраваць паведамленні ў сацсетках для таго, каб пазбегнуць магчымых судовых пазоваў.
«Ахвярай» такой палітыкі могуць стаць і твіты самога прэзідэнта ЗША.
Для ўнясення змяненняў у закон спатрэбіцца адпаведнае рашэнне Кангрэса, але на Капіталійскім пагорку ўжо далі зразумець, што не збіраюцца падтрымліваць ініцыятыву Дональда Трампа.
У твітах Трампа, якія адміністрацыя сеткі пазначыла як не адпаведныя фактам, гаварылася аб тым, што пашырэнне галасавання па пошце створыць умовы для маштабных укідаў. Твіты з гэтым папярэджаннем па-ранейшаму даступныя ўсім. Тым часам усе даследаванні паштовага галасавання ў ЗША паказваюць на тое, што махлярства — вельмі рэдкая з'ява.
Кіраўнік Twitter Джэк Дорсі, са свайго боку, напісаў: «Мы працягнем паказваць на няслушную або спрэчную інфармацыю пра выбары ва ўсім свеце».
