Блогер Сцяпан Пуціла сыходзіць з «Белсата»
Блогер Сцяпан Пуціла сыходзіць з тэлеканала «Белсат».
«Прыйдзе час — раскажу пра прычыны», — сказаў блогер у размове з карэспандэнтам «НН». Пасля сыходу з тэлебачання Сцяпан плануе сканцэнтравацца на працы над сваім тэлеграм- і ютуб-каналамі.
Сцяпан Пуціла. Фота belsat.eu.
Кіраўнік аддзела інфармацыі «Белсата» Зміцер Ягораў так пракаментаваў у сваім фэйсбуку: «Апошні выпуск «Суб'ектыва» (сатырычная перадача, у стварэнні якой удзельнічаў Сцяпан Пуціла — «НН») выйдзе 26 чэрвеня. Пра гэта было абвешчана ў карпаратыўным камунікатары з тыдзень таму. Сцяпан будзе больш часу аддаваць сваім уласным праектам, а ранейшая супраца з Белсатам у выглядзе праекту «Суб'ектыў», на жаль, будзе завершаная.
Кожны праект мае свой пачатак і мае сваё завяршэнне, гэта нармальна. Зрэшты, не выключана, што супраца са Сцёпам будзе працягнутая ў нейкім іншым фармаце», — напісаў Ягораў.
Сцяпан Пуціла — адзін з найбольш папулярных беларускіх блогераў. На два ягоныя каналы ў тэлеграме падпісана 283 тысячы і 213 тысяч карыстальнікаў адпаведна. На ютубе ён мае 405 тысяч падпісчыкаў — гэта значна болей, чым, напрыклад, у Сяргея Ціханоўскага.
Пуціла з’яўляецца адным з найбольш рэзкіх крытыкаў палітыкі Аляксандра Лукашэнкі. Блогер жыве ў Польшчы.