Яшчэ адна краіна ў свеце легалізавала аднаполыя шлюбы
Wikimedia Commons
Гэта Коста-Рыка. З нагоды ўступлення адпаведнага закона ў сілу прэзідэнт краіны Карлас Альвара заявіў, што мэтай яго краіны з'яўляецца барацьба з любымі формамі дыскрымінацыі, піша Deutsche Welle.
Першымі грамадзянамі Коста-Рыкі, якiя заключылi аднаполы шлюб, сталі дзве жанчыны. Цырымонія іх шлюбу, якая праходзіла з-за пандэміі каранавіруса без гасцей, транслявалася па дзяржаўным тэлебачанні. У інтэрнэце за ёй сачылі 15 тысяч чалавек, у тым ліку міжнародныя дзеячы мастацтва і вярхоўны камісар ААН па правах чалавека Мішэль Бачэлет.
Па ініцыятыве Коста-Рыкі Міжамерыканскі суд па правах чалавека у 2018 годзе рэкамендаваў легалізаваць аднаполыя шлюбы, заклікаўшы 11 лацінаамерыканскіх дзяржаў, у якіх такія шлюбы яшчэ не ўзаконеныя, «прызнаць і гарантаваць усе правы, якія тычацца сямейных адносін паміж людзьмі аднаго і таго ж полу».
Коста-Рыка стала першай з гэтых краін, калі выканала дадзеную рэкамендацыю. Балівія, Куба, Сальвадор, Гватэмала, Гандурас, Нікарагуа, Панама, Парагвай, Перу і Дамініканская рэспубліка па-ранейшаму не прызнаюць аднаполыя шлюбы, у той час як у Аргенціне, Бразіліі, Калумбіі, Уругваі і некаторых штатах Мексікі аднаполыя сем'і легалізаваныя.
У Чылі і Эквадоры прызнана мадэль грамадзянскага аднаполага партнёрства, аднак аднаполыя партнёры ў гэтых краінах не зраўняныя ў правах з членамі традыцыйных сем'яў.
