Бабарыка: Мне прапаноўвалі пасаду прэм'ера за зняцце з выбараў. Хто — сакрэт
Хтосьці з прэтэндэнтаў на пасаду прэзідэнта Беларусі прапаноўваў Віктару Бабарыку пасаду прэм'ер-міністра ў абмен на зняццё яго кандыдатуры. Пра гэта ён распавёў падчас сустрэчы з удзельнікамі ініцыятыўнай групы, адказваючы на пытанне аб магчымасці аб'яднання, піша tut.by.
— Не вельмі зразумела, якое аб'яднанне. Гэта значыць аб'яднацца для чаго? Для таго, каб разам здаваць [подпісы]? Была прапанова: «Давайце аб'яднаемся». Я кажу: «Як?» — «Ну, вы здымецеся, а мы вам дамо пасаду прэм'ер-міністра». Я кажу: «Выдатнае аб'яднанне».
Але Бабарыка сышоў ад адказу, хто прапанаваў пасаду прэм'ера: «Я не каментую без згоды іншых асоб, гэта я лічу проста некарэктна».
Па словах Бабарыкі, ён дапускае магчымасць аб'яднання з іншымі кандыдатамі, але на больш познім этапе.
— Мне здаецца, правільней на гэтым этапе ісці [асобна]. Калі мы ўсе хочам, каб выбары ў нас прайшлі на альтэрнатыўнай аснове. Ужо разглядаецца варыянт аб'яднання пасля ста тысяч [подпісаў] — каго зарэгіструюць. Вось тут цалкам магчымая гісторыя. Я заўсёды гатовы да кампрамісу, да дыялогу, жыццё мяне навучыла, што кампраміс, дамоваздольнасць — гэта самыя важныя рысы для чалавека. Таму я заўсёды адкрыты да любога дыялогу.
«Навошта ахова прэзідэнту — я не ведаю»
Па словах былога банкіра, ісці ў прэзідэнты ён зусім не баіцца.
Многія пытаюцца: а ці не страшна? Я не зусім разумею, чаго баяцца. Я выключаю сілавое ўздзеянне, проста выключаю. Што тычыцца астатняга — ну, выганяць мяне з працы. Але я ўмею нешта рабіць, знойдзецца ў іншым месцы. Не знойдзецца — з'еду з краіны.
Паводле слоў Бабарыкі, у выпадку перамогі на выбарах ён паспрабуе адмовіцца ад аховы і не жыць у асобнай рэзідэнцыі.
— Я ездзіў 20 гадоў без аховы. Я не ведаю, навошта мне патрэбна ахова. Разумею, навошта мне патрэбен памочнік, сакратар. Навошта ахова прэзідэнта — я не ведаю. Калі гэта неабходна — будзем думаць. А калі гэта надуманая гісторыя, я хацеў бы застацца ў сябе дома.
