Пастаўкі расійскага газу па «Ямал — Еўропа» ўпалі амаль да нуля
Пастаўкі газу па трубаправодзе «Ямал — Еўропа», па якім газ з Расіі праз Беларусь і Польшчу ідзе ў Германію, знізіліся ў панядзелак практычна да нуля. Пра гэта сведчаць даныя аператараў еўрапейскіх газаправодаў, піша tass.ru.
Паводле звестак кампаніі Gascade, пастаўкі газу ў пункце Мальноў на польска-нямецкай мяжы ў выхадныя пачалі паступова зніжацца і да раніцы панядзелка дасягнулі ўзроўню 461,468 кВт/г, што ў 105 разоў менш за аб'ём намінацыі. Пры гэтым з пачатку месяца аб'ём паставак вар'іраваўся прыблізна ад 17-32 млн кВт/г.
Тэрмін дзеяння доўгатэрміновага расійска-польскага пагаднення аб транзіце газу з Расіі на захад па польскім участку газаправода «Ямал — Еўропа» скончыўся 17 мая. Цяпер пастаўкі ажыццяўляюцца на аснове аўкцыёнаў, якія праводзяцца аператарам газатранспартнай сеткі Польшчы — кампаніяй Gaz System. У пятніцу на аўкцыёне з пастаўкай на працягу дня было набыта 28,5 млн кВт/г з даступных больш чым 38 млн кВт/г. У суботу ўжо ўдвая менш — 12,5 млн.
23 мая на аўкцыёне было прададзена толькі 4 млн кВт/г на прапампоўку газу ў нядзелю. 24 мая наогул не было зарэзервавана ніякіх магутнасцяў. Толькі ў ноч на панядзелак на аўкцыёне было зарэзервавана 4 млн кВт/г на бліжэйшыя так званыя газавыя суткі, якія пачынаюцца ў 06:00 раніцы і сканчаюцца роўна праз 24 гадзіны — у 06:00 раніцы наступнага дня.
Эксперты прадказваюць хуткі сыход цэнаў на газавыя ф'ючарсы «ў мінус», як гэта было з нафтай некаторы час таму. Нагадаем, Беларусь набывае расійскі газ, згодна з ранейшымі дамоўленасцямі, па 127 даляраў за кубаметр.
