Гомельскі школьнік не вярнуў пракатны гіраскутар, а бацькам сказаў, што абмяняў яго на самакат
12 мая ў Гомелі пракатам скарысталіся двое падлеткаў, узяўшы гіраскутар. Пакаталіся і вярнулі назад. Прыкладна праз гадзіну яны зноў вярнуліся, каб паўтарыць ранішні заезд. Пасля гадзіны дня адзін з хлопцаў вярнуўся, каб зноў скарыстацца паслугай пракату.
Толькі з веладарожкі вакол возера да прызначанага часу ён ужо не вярнуўся. Бізнэсмен чакаў яшчэ каля дзвюх гадзін, спадзяючыся на свядомасць юнака. А калі зразумеў, што той наўрад ці вернецца, набраў тэлефон 102.
14-гадовы школьнік на гіраскутары паспеў удосталь пакатацца па мікрараёне «Сельмаш», пасля чаго прыехаў дадому. Натуральна, што дома ў бацькоў узніклі пытанні наконт дарагой цацкі. Але юнак загадзя прадумаў варыянт адказу, маўляў, абмяняў на самакат. Толькі ўвечары ў дзверы пазванілі, і супрацоўнік міліцыі паведаміў бацьку, што гіраскутар скралі.
Завялі крымінальную справу.
