Выяўлены небяспечны сіндром, які ўзнікае ў дзяцей падчас каранавіруса
Некаторыя дзеці ў Брытаніі і ЗША перанеслі рэдкае, але небяспечнае запаленчае захворванне, звязанае з каранавірусам, піша bbc.com.
Дыягнаставалі гэта захворванне, якое можа выклікаць сімптомы, падобныя да сіндрому таксічнага шоку, і ў іншых краінах Еўропы.
У Брытаніі пацярпелі да сотні дзяцей. Некаторыя мелі патрэбу ў інтэнсіўнай тэрапіі, іншыя ж ачунялі хутка.
У Лондане захварэла восем дзяцей. Адно дзіця памерла.
Паводле дактароў, ва ўсіх васьмі дзяцей былі падобныя сімптомы: высокая тэмпература, сып, чырвоныя вочы, ацёкі і боль у целе.
Большасць дзяцей не мелі вялікіх праблем з лёгкімі або дыханнем, хоць семярых падключылі да ШВЛ, каб палепшыць працу сэрца і кровазварот.
Дактары апісваюць стан дзяцей як «новую з'яву», падобную да сіндрому Кавасакі — рэдкага стану, на які пакутуюць у асноўным дзеці да пяці гадоў. Сімптомы ўключаюць сып, набраклыя залозы на шыі і сухія патрэсканыя вусны.
Але гэты новы сіндром можа быць і ў дзяцей старэйшага веку — да 16 гадоў. Зрэшты, сур'ёзныя ўскладненні назіраюцца ў меншасці.
Доктар Ліз Вітэйкер з Імперскага каледжа Лондана, кажа, што той факт, што сіндром паўстаў пасярод пандэміі, сведчыць аб тым, што яны звязаныя.
«Адбыўся пік COVID-19, а затым праз тры-чатыры тыдні мы назіраем пік у гэтай новай з'яве. Гэта прымушае нас думаць, што гэта — постінфекцыйная з'ява», — сказала яна.
Гэта значыць, хутчэй за ўсё, сіндром звязаны з назапашваннем антыцелаў пасля заражэння каранавірусам.
Прафесар Расэл Вінер, прэзідэнт Каралеўскага каледжа педыятрыі і здароўя дзяцей, кажа, што большасць дзяцей добра адрэагавалі на лячэнне і іх пачынаюць выпісваць.
Сіндром з'яўляецца «вельмі рэдкім», адзначыў ён.
Паводле яго слоў, калі навукоўцы даведаюцца больш аб гэтай запаленчай хваробе, то, магчыма, зразумеюць, чаму некаторыя дзеці моцна хварэюць на COVID-19, у той час як большасць не заражаецца наогул ці не мае сімптомаў.
Падобныя выпадкі зафіксавалі таксама ў ЗША, Іспаніі, Італіі, Францыі і Нідэрландах.
У той жа час спецыялісты па пытаннях дзіцячага здароўя ў Брытаніі мяркуюць, што такі стан можа ўзнікаць не толькі ў дзяцей.
Цяпер яны супрацоўнічаюць з амерыканскімі і еўрапейскімі даследчыкамі, каб даведацца больш пра сіндром. Ён атрымаў назву «педыятрычны запаленчы мультысістэмны сіндром» або PIMS-TS.
