Сёння стартаваў яшчэ адзін футбол у Еўропе. У гэтым рэгіёне ўжо два тыдні не фіксуецца каранавіруса
Беларускі футбол больш не адзіны на кантыненце.
Фота з Вікіпедыі
9 мая стартавала прэм'ер-ліга (Effodeildin) футбольнага чэмпіянату Фарэрскіх выспаў. Там у першынстве бяруць удзел 10 клубаў, і сёння праходзяць усе пяць матчаў.
Старт прэм'ер-лігі быў адкладзены з-за ўспышкі каранавіруса.
На выспах жыве ўсяго 48 тысяч насельніцтва, Фарэры з'яўляюцца аўтаномным рэгіёнам Даніі, але маюць шырокую самастойнасць, уключна са зборнай і прадстаўніцтвам у еўракубках.
З пачатку сакавіка на каранавірус захварэлі 187 чалавек, але ніхто не памёр.
Прычым 17 сакавіка колькасць выпадкаў склала максімальныя 29, а з 24 красавіка новых фактаў каранавіруса не фіксуецца зусім (23-га красавіка былі два выпадкі).
На наступным тыдні, 16 мая, павінна аднавіцца нямецкая бундэсліга. Чэмпіянаты Францыі, Нідэрландаў і Бельгіі аднаўляцца не будуць. Італія, Англія і Іспанія пад пытаннем.
