Еўрапейскія навукоўцы знайшлі антыцела, здольнае перамагчы каранавірус
Міжнародная група навукоўцаў падчас эксперыментаў, праведзеных ва Утрэхцкім універсітэце, знайшла монакланальнае антыцела, якое змагло ў лабараторных умовах адолець COVID-19. Артыкул аб сваім даследаванні навукоўцы апублікавалі 4 мая ў навуковым часопісе Nature Communication, піша tass.ru.
Монакланальныя антыцелы — гэта антыцелы (бялкі), што выпрацоўваюцца імуннымі клеткамі, якія належаць да аднаго клеткавага клону. Іх шырока выкарыстоўваюць у біялогіі і медыцыне, напрыклад, на іх аснове ствараюцца вакцыны.
Навукоўцы з Утрэхцкага ўніверсітэта высветлілі, што монакланальнае антыцела 47D11 нейтралізуе бялок, з дапамогай якога вірус SARS-CoV-2 пранікае ў клеткі чалавека.
Аўтары артыкула маюць намер працягнуць эксперыменты з дадзеным антыцелам, каб у перспектыве стварыць прэпараты, неабходныя для лячэння каранавіруснай інфекцыі.
Раней пра падобнае адкрыццё канадскіх навукоўцаў заявіў прэм'ер-міністр Канады Джасцін Трудо.
