Кітайскія навукоўцы: Заражэнне каранавірусам не гарантуе далейшы імунітэт, занадта мала антыцел
Шанхайскія даследчыкі з універсітэта Фудан прааналізавалі наяўнасць антыцел у 175 людзей, якія перахварэлі на новы каранавірус COVID-19. Аказалася, што ў траціны ачунялых антыцел настолькі мала, што яны тэарэтычна зноў могуць заразіцца COVID-19, піша South China Morning Post. А у 10 чалавек антыцел не было наогул.
Фота Надзеі Бужан.
Каманда з універсітэта Фудан прааналізавала ўзоры крыві 175 пацыентаў, выпісаных з Шанхайскага грамадскага медыцынскага цэнтра, і выявіла, што амаль у траціны быў нечакана нізкі ўзровень антыцел. Гэта значна павышае рызыкі паўторнага заражэння гэтых людзей COVID-19.
У некаторых выпадках антыцелы наогул не былі выяўлены.
Хоць даследаванне было папярэднім і на малой групе пацыентаў, гэта было першае ў свеце сістэматычнае даследаванне ўзроўняў антыцел у пацыентаў, якія ачунялі пасля COVID-19.
Цікава, што колькасць антыцел павялічвалася з узростам. Людзі ва ўзроставай групе 60—85 гадоў дэманстравалі больш чым у тры разы больш антыцел, чым людзі ва ўзросце 15-39 гадоў.
Нізкая колькасць антыцел можа паўплываць на выпрацоўку групавога імунітэту і ўстойлівасць да захворвання сярод усяго насельніцтва.