Міліцыя не будзе штрафаваць за пратэрмінаваны пашпарт
Калі тэрмін дзеяння пашпарта скончыўся, то можна атрымаць штраф да 108 рублёў (4 базавыя велічыні). Такое пакаранне прадугледжана артыкулам 23.53 КоАП.
Аднак зараз з-за складанай сітуацыі з каранавірусам не кожны рызыкне ісці ў «пашпартны стол» (разлікова-касавы цэнтр).
«Мы думаем пра здароўе грамадзян, — пракаментавала «Мінск-навінам» сітуацыю прэс-сакратар МУС Беларусі Вольга Чамаданава, — калі тэрмін дзеяння вашага пашпарта мінуў цяпер, у перыяд няпростай эпідэміялагічнай сітуацыі, меры адміністрацыйнага ўздзеяння з боку супрацоўнікаў падраздзяленняў па грамадзянстве і міграцыі прымяняцца не павінны, бо людзі па аб'ектыўных прычынах не могуць асабіста падаць дакументы. Выдатна разумеем, што цяпер усе хочуць як мага менш наведваць грамадскія месцы. Калі чалавек не памяняе пашпарт сёння, заўтра ці праз месяц, у любым выпадку ён гэта зробіць праз нейкі час. Мы не будзем у цяперашняй сітуацыі штрафаваць людзей за пратэрмінаваныя пашпарты. Калі ён у вас пратэрмінаваны, то як толькі становішча з каранавірусам уладзіцца, дакумент неабходна як мага хутчэй замяніць».
