З сённяшняга дня ў Літве нашэнне масак стала абавязковым
10 красавіка ў Літве ўступіла ў сілу патрабаванне ўрада, звязанае з нашэннем масак ці іншых сродкаў абароны для твару ў грамадскіх месцах, піша Delfi.lt.
Delfi.lt
З гэтага часу ў грамадскіх месцах «трэба насіць сродкі абароны, якія закрываюць рот і нос (маскі, рэспіратары і інш.)». Раней гэта было толькі рэкамендацыяй. За парушэнне новага парадку пагражае штраф як за парушэнне правілаў каранціну — ад 500 да 1000 еўра, для юрыдычных асоб — ад 1500 да 6000 еўра.
І прэм'ер-міністр Літвы Саўлюс Сквярняліс, і генкамісар Рэнатас Пажэла запэўнілі, што паліцыя не будзе спяшацца з прызначэннем штрафу, кожную сітуацыю будзе разглядаць асобна.
Акрамя таго, 10 красавіка ў 20:00 уступае ў сілу яшчэ адно абмежаванне — будзе закрыты ўезд у гарады для тых, хто не з'яўляецца іх жыхаром ці не валодае ў іх нерухомасцю. Гэта абмежаванне ўвялі на тры дні, каб спыніць перамяшчэнне жыхароў на Вялікдзень.
