Урад выдаў пастанову аб самаізаляцыі. Што гэта такое і каго закране?
Урад Беларусі ўводзіць на тэрыторыі краіны такое абмежавальнае мерапрыемства, як самаізаляцыя. Саўмін растлумачыў, хто павінен будзе адправіцца на самаізаляцыю і што пагражае парушальнікам, піша tut.by.
На самаізаляцыю павінны быць змешчаны грамадзяне Беларусі, замежнікі і асобы без грамадзянства ў наступных выпадках:
- калі ў іх ёсць інфекцыя COVID-19;
- калі яны адносяцца да кантактаў першага ўзроўню з асобамі, якія маюць інфекцыю COVID-19, — на працягу 14 каляндарных дзён з даты апошняга кантакту; да кантактаў другога ўзроўню з асобамі, якія маюць інфекцыю COVID-19, пры наяўнасці аднаго або некалькіх рэспіраторных сімптомаў — на перыяд наяўнасці названых сімптомаў. Высветліць, да кантактаў якога ўзроўню адносіцца той ці іншы чалавек можа Міністэрства аховы здароўя;
- калі яны прыбылі ў Беларусь з краін, у якіх рэгіструюцца выпадкі інфекцыі COVID-19, на працягу 14 каляндарных дзён з дня прыбыцця.
Тым, хто адправіцца на самаізаляцыю, уручаць патрабаванне аб выкананні правілаў. Людзям на гэты перыяд выдадуць ліст непрацаздольнасці, будуць выплачваць абавязковыя страхавыя ўзносы.
Калі чалавек парушыць патрабаванні аб самаізаляцыі, то дапамога па часовай непрацаздольнасці будзе прызначаная ў памеры 50 працэнтаў ад вызначанай па заканадаўстве. Тэрміны знаходжання грамадзян у самаізаляцыі могуць быць працягнутыя па рашэнні дактароў.
Асобы, якія знаходзяцца ў самаізаляцыі, абавязаны:
- не пакідаць месца пражывання (знаходжання), у тым ліку не хадзіць на працу (вучобу), у аб'екты гандлю і грамадскага харчавання, спартыўныя, выставачныя і канцэртныя залы, кінатэатры, вакзалы і іншыя месцы масавага знаходжання людзей. Дазваляецца выйсці ў найбліжэйшую прадуктовую краму ці аптэку, а таксама вынесці смецце;
- пры выхадзе з жылога памяшкання ў выпадках крайняй неабходнасці выкарыстоўваць маску, не дапускаць кантактаў з іншымі асобамі;
- паведаміць наймальніку пра прычыну адсутнасці на працы;
- выключаць карыстанне паслугамі, якія прадугледжваюць кантакты з іншымі асобамі, акрамя выпадкаў, калі такія паслугі патрабуюцца для забеспячэння бяспекі жыццядзейнасці;
- пры пагаршэнні стану здароўя (павышэнне тэмпературы цела да 37°C і вышэй, з'яўленне кашлю, дыхавіцы) звярнуцца ў хуткую медыцынскую дапамогу па тэлефоне 103 або адправіўшы SMS-паведамленне, паведаміўшы пры гэтым пра знаходжанне ў самаізаляцыі.
У пастанове сказана, што парушэнне патрабаванняў аб самаізаляцыі цягне адказнасць у адпаведнасці з заканадаўчымі актамі.
Міністэрству аховы здароўя дадзена тры дні, каб прыняць меры па рэалізацыі пастановы. Дакумент уступае ў сілу пасля яго апублікавання і дзейнічае да спецыяльнага рашэння ўрада.
Мінздароўя: У Беларусі зафіксавалі 1066 выпадкаў каранавіруса
